कल्याण, ता. १३ (वार्ताहर) : कल्याण पूर्व विधानसभा मतदारसंघाच्या स्थिर सर्वेक्षण पथकाने उसाटणे नाक्यावरील नवी मुंबईकडून कल्याणच्या दिशेने येणाऱ्या वाहनांची तपासणी केली होती. या तपासणीदरम्यान पथकाला बेकायदा वस्तू आणि दोन लाख आठ हजार ३७० रक्कम आढळली. ही रोख रक्कम आणि बेकायदा वस्तू जप्त करण्यात आल्या आहेत.
उसाटणे नाका या ठिकाणी नवी मुंबईकडून कल्याणच्या दिशेने येणाऱ्या वाहनांची तपासणी केली जात आहेत. या वेळी तपासणी दरम्यान वाहनचालकाच्या बाजूच्या सीटवर दोन पिशव्या निदर्शनास आल्या. त्याबाबत संबंधित वाहनचालकाला स्थिर सर्वेक्षण पथकाने विचारणा केली असता, त्या‍मध्ये रोख रक्कम असल्याचे सांगितले. परंतु, रकमेबाबत संबंधित व्यक्तीने काहीही स्पष्टीकरण दिले नाही. त्यामुळे स्थिर सर्वेक्षण पथकाने रक्कम ताब्यात घेत पंचनामा केला. रात्रीच्या वेळी उपकोषागार कार्यालय बंद असल्यामुळे हिललाईन पोलिस ठाण्यात हे लिफाफे सिलबंद करून त्यावर पंचांच्या व पथकप्रमुखाच्या स्वाक्षऱ्या घेण्यात आल्या. या रकमेचे लिफाफे आता एका स्टिलच्या पेटीत कुलूप बंद करून कल्याण कोषागारात सिलबंद करण्यात आले आहेत. तसेच ते स्ट्राँगरूममध्ये ठेवल्याची माहिती पथकाचे प्रमुख राहुल गायकवाड यांनी दिली आहे.