उत्तर पूर्व मतदारसंघाच्या खर्च तपासणीला सुरुवात

मुंबई, ता. ११ : मुंबई उत्तर पूर्व मतदारसंघातील उमेदवारांच्या प्रचार कालावधीतील खर्चाची तीन वेळेस तपासणी होणार आहे. ही पहिली खर्च तपासणी केंद्रीय खर्च निवडणूक निरीक्षक डॉ. सुनील यादव यांनी विक्रोळी येथील कार्यालयात केल्याची माहिती निवडणूक निर्णय अधिकारी डॉ. दादाराव दातकर यांनी दिली. यावेळी खर्च सनियंत्रण कक्षाचे समन्वय अधिकारी सीताराम काळे उपस्थित होते. पुढील तपासणी १४ व १८ मे रोजी सकाळी १० ते दुपारी एक या वेळेत होणार आहे.
मुंबई उत्तर पूर्व लोकसभा मतदारसंघातून एकूण २० उमेदवार लोकसभा सार्वत्रिक निवडणूक लढवित आहेत. नामनिर्देशनपासून निकालापर्यंत उमेदवाराने किंवा त्यांच्या प्रतिनिधीने निवडणूक खर्च ठेवणे बंधनकारक असणार आहे. यापुढील तपासणी मतदारसंघाचे कार्यालय, पिरोजशहा नगर, सांस्कृतिक सभागृह, स्टेशन साईड कॉलनी, गोदरेज कॉलनी विक्रोळी स्टेशनजवळ विक्रोळी पूर्व येथे होणार आहे.