विरार (बातमीदार) : वसई तालुक्यातील पश्चिम पट्ट्यातील सत्पाळे गावातील भूमिगत श्री मामावंती देवी बुधवारी (ता. १५) सायंकाळी ठीक पाच वाजता दर्शनासाठी बाहेर काढण्यात येणार आहे. २१ मे रोजी सायंकाळी साडेपाच वाजता देवीची मिरवणूक काढून, देवी पूर्ववत भूमिगत करण्यात येणार आहे. १५ ते २१ मेदरम्यान यात्रोत्सवानिमित्ताने विविध कार्यक्रमांचे आयोजन करण्यात आले आहे.

१५ मे रोजी श्री मामावंती देवी दर्शनासाठी वाजत-गाजत भंडारआळी गावात आगमन होणार आहे. याच दिवशी सत्यनारायण महापूजा आणि नारदीय कीर्तन हभप कैलास बुवा खरे (पुणे) यांचे देवीमहात्म्य व कथा राखा कुंभार या विषयावर नारदीय कीर्तन होणार आहे. सहा दिवसांमध्ये विविध कार्यक्रमाचे आयोजन करण्यात आले आहे. यात अभंग वाणी- श्री हनुमान प्रासादिक भजन मंडळ, नवाळे, बुवा दत्तात्रय वर्तक, लायन्स क्लब आगाशी, समाजकल्याण न्यास पालघर, श्री जलाराम आरोग्य केंद्र व हरेकृष्ण नेत्र चिकित्सालय पुरस्कृत आरोग्य शिबिर, हळदी- कुंकू सांस्कृतिक कार्यक्रम होणार आहेत.