उरण, ता. १३ (वार्ताहर) : उरण विधानसभा मतदारसंघात सकाळी सात वाजल्यापासूनच मतदानाला सुरुवात झाली. वयोवृद्ध, तरुण, नवमतदारांनी आपला मतदानाचा हक्क बजावताना त्यांच्या चेहऱ्यावर चैतन्य दिसत होते. खासगी कंपन्या सुरू असल्याने सकाळच्या सत्रात नोकरवर्गाने मतदान करण्यास पसंती दिली. महिलांनी आपली सकाळची कामे आटोपून दुपारच्या कडक उन्हातही आपला मतदानाचा हक्क बजावला. सायंकाळी चार वाजेपर्यंत उरण विधानसभेसाठी ४२.१७ टक्के मतदान झाले होते. यामध्ये महिलांचे मतदान जास्त असल्याचे दिसून येत आहे. या मतदारसंघात शहरी भागापेक्षा ग्रामीण भागात मतदान जास्त झाले आहे. उरणमधील ग्रामीण भागातील काही गावांमध्ये गावातील आपले अस्तिव टिकविण्यासाठी ग्रामपंचायतीला होणाऱ्या मतदानाप्रमाणे लोकांपर्यंत पोहचून मतदान करण्यासाठी केंद्रापर्यंत आणले जाते असल्याने मतदान जास्त झाले. कोणत्याही प्रकारचे गालबोट न लागता निवडणूक शांततेत पार पडली असल्याची माहिती उरणचे तहसीदार उद्धव कदम यांनी दिली.