एअरटेल-गुगल क्लाऊडमध्ये करार
मुंबई, ता. १३ : भारतीय कंपन्या आणि व्यवसायांना क्लाऊड साधने पुरवण्यासाठी भारती एअरटेल आणि गुगल क्लाऊड यांनी दीर्घकालीन सहकार्याची घोषणा केली आहे. या कराराद्वारे भारती एअरटेलच्या ग्राहकांना अत्याधुनिक सेवा दिल्या जातील.
भारती एअरटेलकडे दोन हजार मोठ्या कंपन्या, तसेच दहा लाख छोटे उद्योजक ग्राहक आहेत. त्यांना क्लाऊड संचालित वेगवेगळ्या सेवाही दिल्या जातील. भारतातील क्लाऊड सेवेची बाजारपेठ २०२७ पर्यंत सुमारे १८ अब्ज डॉलरपर्यंत जाण्याची शक्यता आहे. त्या बाजारपेठेतील मोठा वाटा मिळवण्याचे या सहकार्य कराराचे उद्दिष्ट आहे.
त्‍यामुळे एअरटेलच्या ग्राहकांना कनेक्टिव्हिटी सोबतच आर्टिफिशियल इंटेलिजन्स तंत्रज्ञानाचे फायदे मिळतील. याद्वारे मार्केट असेसमेंट, साईट सिलेक्शन, रिस्क मॅनेजमेंट, असेट ट्रॅकिंग, मार्केटिंग टेक्नॉलॉजी आदी वैशिष्ट्ये ग्राहकांना मिळतील. क्लाऊड साधने पुरवण्याच्या व्यवसायासाठी एअरटेल ने ३०० तज्‍ज्ञांचे सेवा केंद्र पुण्यात सुरू केले आहे, अशी माहिती भारती एअरटेलचे मुख्य कार्यकारी अधिकारी आणि व्यवस्‍थापकीय संचालक गोपाल विठ्ठल यांनी दिली.