सकाळ वृत्तसेवा
मुंबई, ता. १३ : नियमांचे उल्लंघन करत पुण्यात रक्त संकलन केंद्राला परवानगी दिल्याचा प्रकार उघडकीस आला आहे. याप्रकरणी मुंबई उच्च न्यायालयात याचिका दाखल करण्यात आली आहे. याबाबत उच्च न्यायालयाने सरकारला नोटीस बजावली आहे.
सोलापूर येथील मोरया मेडिकल रिलीफ अँड चॅरिटेबल ट्रस्ट या संस्थेला पुणे येथे नवीन रक्तसंकलन केंद्र उभारायचे असून तसा अर्ज त्यांनी राज्य रक्त संक्रमण परिषदेकडे केला होता, मात्र या ठिकाणी नवीन रक्तपेढीची गरज नसल्याचे सांगत त्यांचा अर्ज नाकारण्यात आला. या ठिकाणी नियमांचे उल्लंघन करत दुसऱ्या रक्तसंकलन केंद्राला परवानगी देण्यात आली. याप्रकरणी मुंबई उच्च न्यायालयात मोरया मेडिकल रिलीफ अँड चॅरिटेबल ट्रस्टच्या वतीने ॲड. विनोद सांगवीकर यांच्यामार्फत याचिका दाखल करण्यात आली. या याचिकेवर न्या. अतुल चांदूरकर आणि न्या. जितेंद्र जैन यांच्यासमोर सुनावणी घेण्यात आली. न्यायालयाने याचिकेची दखल घेत राज्य सरकारला नोटीस बजावत सुनावणी १० जून रोजी ठेवली आहे.