सकाळ वृत्तसेवा
मुंबई, ता. १३ : १४ वर्षांच्या सख्ख्या भावाने केलेल्या लैंगिक अत्याचारामुळे गर्भवती राहिलेल्या १२ वर्षांच्या पीडितेला मुंबई उच्च न्यायालयाने दिलासा दिला आहे. २६ आठवड्यांनंतर गर्भपात करण्यास सुटीकालीन न्यायालयाने परवानगी दिली आहे.

पालघर जिल्ह्यातील एका कुटुंबात सख्ख्या भावाने लहान बहिणीवर लैंगिक अत्याचार केला होता. त्यात ती गर्भवती राहिली. पीडित मुलगी २६ आठवड्यांची गर्भवती असल्याने गर्भपात करण्यासाठी उच्च न्यायालयाची परवानगी द्यावी, अशी विनंती तिच्या पालकांनी केली होती. सुटीकालीन न्यायालयाचे न्या. संदीप मारणे आणि न्या. डॉ. नीला गोखले यांच्या खंडपीठासमोर आज (ता. १३) यावर सुनावणी घेण्यात आली. न्यायालयाने वैद्यकीय अहवाल आणि मुलीच्या मानसिकतेचा विचार करता गर्भपात करण्यास तिला परवानगी दिली.