शिक्षक-पदवीधर निवडणूक पुढे ढकला!
शिक्षक भारतीची उच्च न्यायालयात याचिका; आज पुन्हा सुनावणी
सकाळ वृत्तसेवा
मुंबई, ता. १३ : निवडणूक आयोगाने शिक्षक-पदवीधर मतदारसंघाची निवडणूक १० जून रोजी जाहीर केली आहे; परंतु मे महिन्याच्या सुट्टीत बाहेर गेलेले शिक्षक व कर्मचारी या मतदानापासून वंचित राहणार आहेत. त्यामुळे हे मतदान जून महिन्याच्या शेवटी घेण्यात यावे, अशी मागणी करत शिक्षक भारतीच्यावतीने उच्च न्यायालयात याचिका दाखल करण्यात आली आहे. न्यायालयाने याचिकेची दखल घेत मंगळवारी (ता. १४) पुन्हा सुनावणी ठेवली आहे.
शिक्षण विभागाने २ मे ते १४ जूनपर्यंत सुट्टी जाहीर केली असून शाळा १५ जूननंतर सुरू होणार आहेत. तसेच १७ जून ते २० जूनपर्यंत बकरी ईदनिमित्त उर्दू माध्यमांच्या शाळांना सुट्टी आहे. मुंबईतील शिक्षक पदवीधर मतदारसंघातील उत्तर भारतीय शिक्षक ११ जून रोजी मुंबईत परतणार आहेत. तसेच महाराष्ट्रातील अनेक शिक्षक सुट्टीमुळे मुंबईबाहेर गेले आहेत. याचा विचार करता निवडणूक आयोगाने शिक्षक-पदवीधर मतदारसंघाची निवडणूक पुढे ढकलावी, अशी मागणी करत शिक्षक भारतीचे सुभाष मोरे यांनी ॲड. सचिन पुंडे यांच्यामार्फत याचिका दाखल केली आहे.

आज अंतिम निर्णय
सुट्टीकालीन न्यायालयाचे न्या. संदीप मारणे व न्या. नीला गोखले यांच्यासमोर सुनावणी घेण्यात आली. त्यावेळी केंद्रीय निवडणूक आयोगाच्या वकिलांनी शिक्षक भारतीच्या मागणीचा विचार करून उद्या अंतिम निर्णय घेऊ, असे खंडपीठाला सांगितले. न्यायालयाने याची दखल घेत सुनावणी मंगळवारी ठेवली.