भिवंडी, ता. १५ (बातमीदार) : शहरातील एका ८५ वर्षीय वृद्ध महिलेच्या बांगड्या हातचलाखीने लंपास करणाऱ्याला शांतीनगर पोलिसांनी छत्रपती संभाजीनगरमधून अटक केली आहे. मोहमद इम्रान मोहमद अमीन अन्सारी (४०) असे अटक केलेल्या चोरट्याचे नाव आहे. रावजीनगर येथील हिना अपार्टमेंटमधील सरफुनिसा मो. समी. चौधरी (८५) ही वृद्ध महिला ३० एप्रिल रोजी नमाज पठण करून येत असताना त्यांना मोहमद इम्रान याने गाठले. माझ्या शेठला मुलगा झाल्याने तो मोहल्ल्यात पैसे वाटत असल्याचे सांगून त्यांच्या हातातील तीन तोळे वजनाच्या सोन्याच्या बांगड्या रूमालात ठेवण्यास सांगितले. त्यांनी बांगड्या रूमालात बांधताच त्या हातचलाखीने चोरून मोहमदने मूळ गावी पलायन केले.
या फसवणूकप्रकरणी शांतीनगर पोलिस ठाण्यात फसवणुकीचा गुन्हा दाखल केला होता.

वरिष्ठ पोलिस निरीक्षक विनायक गायकवाड यांच्या मार्गदर्शनाखाली पोलिस निरीक्षक विनोद पाटील, पोलिस निरीक्षक (गुन्हे) अतुल अडुरकर, सहायक पोलिस निरीक्षक सुरेश चोपडे, पोलिस उपनिरीक्षक सुरेश घुगे, पोलिस हवालदार संतोष पवार, पोलिस नाईक किरण जाधव, श्रीकांत पाटील, पोलिस शिपाई नरसिंह क्षीरसागर, रवींद्र पाटील, रोशन जाधव, तौफिक शिकलगार, विजय ताटे यांच्या पोलिस पथकाने गुन्ह्याचा तपास सुरू केला. तसेच सीसीटीव्हीच्या आधारे गुप्त बातमीदारामार्फत माहिती घेतली असता त्याचे नाव मोहमद इम्मान अंसारी असून तो छत्रपती संभाजीनगर येथे वास्तव्यास असल्याची माहिती प्राप्त झाली. त्यानंतर पोलिस पथकाने छत्रपती संभाजीनगरमधून त्याला अटक केली. तसेच गुन्ह्यातील एक लाख १५ हजार किमतीच्या तीन सोन्याच्या बांगड्या जप्त केल्या. पुढील तपास शांतीनगर पोलिस करीत आहेत.