घाटकोपर दुर्घटनेतील जखमींना अडीच लाखांपर्यंत अर्थसाह्य
मंगलप्रभात लोढा यांची घोषणा, जखमींचा उपचाराचा खर्च सरकार करणार

मुंबई, ता. १४ : वादळी पाऊस आणि वाऱ्यामुळे घाटकोपर येथे होर्डिंग कोसळून झालेल्या दुर्घटनेतील जखमींना अडीच लाख रुपयांपर्यंत अर्थसाह्य देण्याची घोषणा करण्यात आली आहे. ही घोषणा उपनगर जिल्ह्याचे पालकमंत्री मंगलप्रभात लोढा यांनी आज (ता. १४) येथे केली.
पालकमंत्री लोढा यांनी राजावाडी हॉस्पिटलमधील जखमींची भेट घेतल्यानंतर त्यांनी मदतीची घोषणा केली. सध्या राजावाडी हॉस्पिटलमध्ये एक जखमी आयसीयूमध्ये असून इतरांच्या प्रकृतीमध्ये सुधारणा होत असल्याचे त्यांनी सांगितले.

जखमींच्या उपचाराचा खर्च सरकार करणार आहे व मुख्यमंत्री आणि उपमुख्यमंत्री यांच्याशी चर्चा करून जखमींना आर्थिक नुकसानभरपाई देणार असल्याचेही त्यांनी स्पष्ट केले. ६० टक्क्यांपेक्षा कमी व्यंग आलेल्या व्यक्तींना ७५ हजार रुपये; तसेच ६० टक्क्यांपेक्षा जास्त व्यंग आलेल्यांना अडीच लाख रुपये तसेच किरकोळ जखमी झालेल्या व्यक्तींना ५० हजार रुपये देण्यात येतील, असेही लोढा यांनी सांगितले.

हे होर्डिंग पेट्रोल पंपाजवळ अनधिकृतरीत्या उभारण्यात आले होते. महापालिकेने नोटीस बजावूनसुद्धा होर्डिंग हटवण्यात आले नाही. त्याचे सेफ्टी ऑडिट किंवा तत्सम प्रक्रियासुद्धा झाल्याचे आढळून आले नाही. त्यामुळे या घटनेला जबाबदार असलेल्या व्यक्तीवर योग्य ती कारवाई केली जाणार असल्याचेही स्पष्टपणे त्यांनी सांगितले.