पालघर, ता. २१ (बातमीदार) : फेब्रुवारी, मार्चमध्ये घेण्यात आलेल्या बारावी उच्च माध्यमिक परीक्षेचा निकाल आज (ता. २१) जाहीर करण्यात आला. पालघर जिल्ह्याचा निकाल ९३.५१ टक्के लागला आहे. उत्तीर्ण होण्यात यावर्षीही मुलींनी आघाडी मारलेली आहे. विशेष म्हणजे, तिन्ही शाखांत उत्तीर्ण होण्याची मुलींचीच आघाडी दिसत आहे.

पालघर जिल्ह्यातून २७ हजार २५९ मुलगे आणि २२ हजार ९५५ मुली असे एकूण ५० हजार २१४ विद्यार्थी परीक्षेला बसले होते. त्यापैकी २५ हजार ११६ मुलगे उत्तीर्ण, तर २१ हजार ८४३ मुली उत्तीर्ण असे एकूण ४६ हजार ९५९ विद्यार्थी उत्तीर्ण झाले. उत्तीर्ण झालेल्या विद्यार्थ्यांमध्ये ९२.१३ टक्के मुलगे, तर ९५.१५ टक्के मुली असा एकूण ९३.५१ टक्के जिल्ह्याचा निकाल लागला.

विज्ञान शाखेत १० हजार ३०० मुलगे आणि आठ हजार ४२८ मुली असे एकूण १८ हजार ७२८ विद्यार्थी बारावीच्या परीक्षेला बसले होते. त्यापैकी नऊ हजार ९५० मुले व आठ हजार २४३ मुली उत्तीर्ण झाल्या. मुलांची उत्तीर्ण होण्याची टक्केवारी ९६.६० टक्के, तर मुलींची ९७.८० टक्के आहे. विज्ञान शाखेची उत्तीर्ण होण्याची सरासरी टक्केवारी ९७.१४ टक्के आहे.

वाणिज्य शाखेत ११ हजार ६८६ मुलगे आणि नऊ हजार ३१२ मुली असे एकूण २० हजार ९९८ विद्यार्थी परीक्षेला बसले होते. त्यापैकी १० हजार ९०८ मुलगे आणि आठ हजार ९५७ मुली असे एकूण १९ हजार ८६५ विद्यार्थी उत्तीर्ण झाले आहेत. यात उत्तीर्ण होण्याची मुलांची टक्केवारी ९३.३४ टक्के, तर मुलींची टक्केवारी ९६.१८ टक्के आहे. वाणिज्य शाखेतही उत्तीर्ण होण्याची मुलींची टक्केवारी मुलांपेक्षा जास्त आहे.

कला शाखेत चार हजार ८६५ मुलगे, तर पाच हजार १४१ मुली असे एकूण १० हजार ००६ विद्यार्थी परीक्षेला बसले होते. त्यापैकी तीन हजार ९०० मुलगे आणि चार हजार ५७५ मुली असे एकूण आठ हजार ४७५ विद्यार्थी उत्तीर्ण झाले आहेत. उत्तीर्ण मुलांची टक्केवारी ८०.१६ टक्के, तर मुलींची टक्केवारी ८८.९९ टक्के आहे. कला शाखेत उत्तीर्ण होण्याची मुलींची टक्केवारी मोठी आहे.

तालुक्यानुसार निकाल (टक्क्यांत)
वाडा ८८.८९
मोखाडा ९१.८०
विक्रमगड ९१.५२
जव्हार ९०.२६
तलासरी ९१.८७
डहाणू ८७.५१
पालघर ९२.७१
वसई ९५.४४
सरासरी ९३.५१