कळवा, ता. २३ (बातमीदार) : ठाणे पोलिस आयुक्तालयाच्या क्षेत्रात सध्या सोनसाखळी, घरफोड्या आणि फसवणुकीच्या घटना वाढू लागल्या आहेत. त्या रोखण्यासाठी आणि नागरिकांमध्ये जनजागृती निर्माण करण्यासाठी ठाणे पोलिस आयुक्तांच्या आदेशानुसार कळवा ठाण्याचे वरिष्ठ निरीक्षक अशोक उतेकर यांच्या मार्गदर्शनाखाली कळवा, खारेगाव, विटावा भागात कळवा पोलिसांनी परेडच्या माध्यमातून जनजागृती सुरू केली आहे.
सध्या मे महिना सुरू आहे. त्यातच शाळा बंद असल्याने आणि प्रचंड उकाडा वाढल्याने अनेक कुटुंबे गावी गेली आहेत. तर काही जण कुटुंबासह बाहेरगावी फिरायला गेली आहेत. याची संधी साधत चाळीतील आणि इमारतीमधील बंद घरांना रात्री व दुपारी लक्ष्य करून चोरटे घरफोडी करत आहेत. दुसरीकडे सकाळ, संध्याकाळी अनेक ज्येष्ठ नागरिक फिरण्यासाठी बाहेर पडतात. तेव्हा काही अज्ञात तरुण दुचाकीवरून येऊन सोनसाखळी खेचून पलायन करतात. अनेकदा रिक्षा अडवून आम्ही पोलिस आहोत, असे भासवून दागिने लंपास करतात. तर काही जणांना पोलिसांची बतावणी करून आम्ही तुमचे दागिने नीट ठेवून देतो. तुमच्या कपड्यावर घाण पडली आहे, असे सांगत लूट केल्यांच्या घटनेत वाढ झाली आहे. अशा घटना घडू नयेत. नागरिकांमध्ये जनजागृती व्हावी, या उद्देशाने कळवा पोलिसांनी हा उपक्रम सुरू केला आहे. त्याला ठिकठिकाणी चांगला प्रतिसाद मिळत आहे.

पोलिस परेड आणि करत असलेल्या जनजागृतीमुळे कळवा परिसरात नागरिकांची फसवणूक व गुन्हे कमी होण्यास मदत होणार आहे. याचा आम्हाला परिसरातून चांगला प्रतिसाद मिळत आहे.
- अशोक उतेकर, वरिष्ठ पोलिस निरीक्षक, कळवा पोलिस ठाणे.