नवी मुंबई, ता. १ (वार्ताहर) : बंद असलेली घरे हेरून दिवसा घरफोडी करणाऱ्या एका सराईत चोरट्याला रबाळे पोलिसांनी भिवंडी येथून अटक केली आहे. शफिक उर्फ टोपी अब्दुल शेख (४६) असे या चोरट्याचे नाव आहे. त्याने रबाळे पोलिस ठाण्याच्या हद्दीत केलेले पाच घरफोडीचे गुन्हे उघडकीस आले आहेत. या गुन्ह्यांतील ६० ग्रॅम वजनाचे सुमारे ४ लाख रुपये किमतीचे दागिने हस्तगत करण्यात पोलिसांना यश आले आहे.
ऐरोली सेक्टर-१ मधील साईनाथ वाडीत राहणारे मयूर धर्मनाथ सैतवाल (३२) हे १४ मे रोजी रोजी सकाळी ९ वाजता आपले घर बंद करून कामानिमित्त बाहेर गेले होते. याचदरम्यान चोरट्याने त्यांच्या घराचा कुलूप तोडून घरातील सोन्याचे मंगळसुत्र चोरून नेले होते. याबाबत रबाळे पोलिस ठाण्यात घरफोडीचा गुन्हा दाखल झाल्यानंतर पोलिसांनी घटनास्थळावरील सीसीटीव्ही फुटेज घेऊन संशयित आरोपींची माहिती मिळविली. त्यावरून पोलिसांनी जुने गुन्हे अभिलेख तपासले असता, यातील संशयित आरोपीचे नाव शफिक अब्दुल शेख उर्फ टोपी असल्याचे समजले. तपास करत असताना २८ मे रोजी भिवंडीतील घुंगटनगर परिसरात शफिक पायी चालत जात असताना पोलिसांनी त्याला तत्काळ ताब्यात घेवुन रबाळे पोलिस ठाण्यामध्ये आणले.

---------
गुन्ह्यांची कबुली
रबाळे पोलिसांनी शफिक उर्फ टोपीकडे सखोल चौकशी केली असता त्याने रबाळे पोलिस ठाण्याच्या हद्दीमध्ये दिवसा घरफोडीचे एकूण पाच गुन्हे केल्याची कबुली दिली. त्यानंतर पोलिसांनी त्याच्याकडून सर्व गुन्ह्यांतील ६० ग्रॅम वजनाचे सुमारे ४ लाख रुपये किमतीचे दागिने हस्तगत केले. या चोरट्याकडून आणखी काही घरफोडीचे गुन्हे उघडकीस येण्याची शक्यता पोलिसांकडून व्यक्त करण्यात येत आहे.