तुर्भे, ता. १ (बातमीदार) : उन्हाळ्यामुळे लिंबू आणि पालेभाज्यांचे दर वाढलेले असतानाच आता कोथिंबीरदेखील महाग झाली आहे. जेवणातील प्रत्येक पदार्थाची चव व शोभा वाढविण्यासाठी गृहिणींकडून कोथिंबीरीला अधिक प्राधान्य दिले जाते. मागच्या महिन्यात किरकोळ बाजारात १० रुपयांना मिळणारी कोथिंबीरीची एक जुडी किरकोळ बाजारात ५० ते ६० रुपये झाली आहे. त्यामुळे कोथिंबीर खरेदी करताना सर्वांनाच हात आखडता घ्यावा लागत आहे. सुरुवातीला पाणी नसल्याने कोथिंबिरीचे पीक काही शेतकऱ्यांना घेता आले नाही. त्यामुळे बाजारात आवक कमी होती. सध्या राज्यात ठिकठिकाणी अवकाळी पाऊस व उन्हाचा पारा यामुळे कोथिंबिरीच्या पिकाला फटका बसला आहे. नाशिक व पुणे जिल्ह्यातून कोथिंबीर एपीएमसीमध्ये येते. बाजारातील कोथिंबीरची गरज पूर्ण करण्यासाठी दररोज ८० ते ९० गाड्यांची आवक व्हावी लागते; मात्र आता फक्त ३७ गाड्या बाजारात येत आहेत. त्यामुळे वाशीतील एपीएमसी घाऊक बाजारात कोथिंबीरच्या एका जुडीचा दर २५ ते ३० रुपये झाला आहे; तर किरकोळ बाजारात ५० पार झाली आहे.