ठाणे, ता. २ (वार्ताहर) : पावसाळ्यात उद्‍भवणाऱ्या बिकट परिस्थतीत पावसाचे पाणी साचल्यानंतर अडकलेल्या नागरिकांची सुखरूप सुटका कशी करावी, याची रंगीत तालीम नौपाडा पोलिस ठाण्याच्यावतीने शुक्रवारी (ता. २) सकाळी, तर राबोडी पोलिस ठाण्याने दुपारी केली. यामध्ये वरिष्ठ पोलिस अधिकारी, पालिका स्थानिक अधिकारी आणि अग्निशमन मंडळाच्या जवानांचा समावेश होता.
नौपाडा येथील चिखलवाडी सार्वजनिक शौचालयाजवळ शुक्रवारी सकाळी ११.२० च्या सुमारास मोठ्या प्रमाणात पावसाचे पाणी साचल्याने जवळील झोपडपट्टीतील काही रहिवासी अडकले आहेत, अशी माहिती आपत्ती व्यवस्थापन कक्षाला मिळाली होती. घटनास्थळी नौपाडा पोलिस ठाण्याचे पोलिस अधिकारी व कर्मचारी, आपत्ती व्यवस्थापन अधिकारी आणि कर्मचारी पिकअप वाहनासह, अग्निशमन दलाचे जवान, ठाणे आपत्ती प्रतिसाद दलाचे जवान, नौपाडा-कोपरी प्रभाग समितीचे कर्मचारी, घनकचरा विभागाचे अधिकारी व कर्मचारी, महावितरणचे कर्मचारी, पालिकेची रुग्णवाहिका दाखल झाली, अशी नौपाडा पोलिसांची रंगीत तालीम अर्धा तास सुरू होती.
दुसरीकडे ठाणे पश्चिम येथील आनंद तरे बंगल्याजवळील, श्रीरंग सोसायटीत पावसाचे पाणी साचल्याने इमारतीमधील काही रहिवासी अडकले होते. ही माहिती मिळताच राबोडी पोलिस ठाण्याचे पोलिस अधिकारी व कर्मचारी, आपत्ती व्यवस्थापन अधिकारी सो. आणि कर्मचारी, उपकार्यकारी अभियंता (उथळसर प्रभाग समिती), अग्निशमन दलाचे जवान, ठाणे आपत्ती प्रतिसाद दलाचे जवान, पालिकेच्या एका रुग्णवाहिकेसह त्वरित घटनास्थळी पोहचले. राबोडी पोलिस ठाण्याची रंगीत तालीम १२ मिनिटांत संपवून नागरिकांची सुखरूप सुटका करण्यात आली.