नेरूळ, ता. २ (बातमीदार) : जागतिक पर्यावरण दिनाच्या पार्श्‍वभूमीवर बेलापूर सेक्टर ५४ येथे एनआरआय कॉम्प्लेक्सजवळील दिल्ली पब्लिक स्कूलनजीकच्या फ्लेमिंगो स्पॉट परिसरात विशेष स्वच्छता मोहीम राबविण्यात आली. नवी मुंबई महापालिका, रोटरी क्लब तसेच डॉ. डी. वाय. पाटील महाविद्यालयाच्या संयुक्त विद्यमाने हा कार्यक्रम पार पडला. पालिका आयुक्त डॉ. कैलास शिंदे यांच्या निदर्शनानुसार स्वच्छ भारत मिशन आणि माझी वसुंधरा अभियानअंतर्गत नवी मुंबई महापालिकेच्या वतीने विविध उपक्रम राबविले जात आहेत. या उपक्रमांतर्गत फ्लेमिंगोंचा वावर असलेले पाणथळ क्षेत्र व परिसरातील प्लास्टिक, कागद व इतर कचरा जमा करून परिसर स्वच्छ करण्याची विशेष मोहीम बेलापूर विभाग कार्यालय क्षेत्रात राबविण्यात आली.
उपायुक्त सोमनाथ पोटरे व डॉ. अजय गडदे, बेलापूर विभागाचे सहायक आयुक्त तथा विभाग अधिकारी शशिकांत तांडेल यांच्या नियंत्रणाखाली ही स्वच्छता मोहीम राबवण्यात आली. सहायक आयुक्त शशिकांत दांडेल यांच्यासोबत उपस्थितांनी माझी वसुंधरा अभियानाची सामूहिक शपथ घेतली.