डहाणू येथे ट्रकची रिक्षाला भीषण धडक
आई व पाच वर्षीय मुलाचा मृत्यू; तिघे गंभीर जखमी
डहाणू, ता. २ (बातमीदार) : सूर्यानगर राज्य मार्गावर रिक्षा आणि राख वाहतूक करणाऱ्या ट्रकचा (बलकर वाहन) भीषण अपघात झाला. या घटनेत एक महिला व तिच्या लहान मुलाचा मृत्यू झाला असून अन्य तिघे गंभीर जखमी झाले आहेत. जखमींवर सिल्वासा येथील रुग्णालयात उपचार करण्यात येत आहेत.

डहाणू येथे रविवारी (ता. २) दुपारच्या सुमारास ‘आसवे’ गावाजवळ चारोटीहून डहाणूकडे येणाऱ्या प्रवासी रिक्षाला राख भरून चारोटीकडे जाणाऱ्या ट्रकने जोरदार धडक दिली. ही धडक इतकी भीषण होती की, प्रवासी रिक्षा शेजारील शेतात फेकली गेली. या रिक्षातून प्रवास करणारे सुवर्णा लाडवी व तिचा पाच वर्षांचा मुलगा प्रशांत (रा. निकावली) यांचा जागीच मृत्यू झाला; तर काशिनाथ डुप्ले, कांचन डुप्ले व विक्रम लाडवी हे गंभीर जखमी झाले. त्यांना उपजिल्हा रुग्णालय डहाणू येथे दाखल केल्यानंतर तिथून पुढील उपचारासाठी सिल्वासा येथील एका खासगी रुग्णालयात दाखल करण्यात आले आहे. या अपघातातील सर्वजण हे एकाच कुटुंबातील असून डहाणू पोलिस तपास करीत आहेत.