रविना टंडनसह चालकावर जमावाकडून हल्ला
अंगावर गाडी घातल्याचा आरोप

सकाळ वृत्तसेवा
मुंबई, ता. २ : बॉलीवूड अभिनेत्री रविना टंडन आणि तिच्या चालकावर वांद्रे परिसरात शनिवारी (ता. १) रात्री जमावाने हल्ला चढविल्याचा व्हिडीओ व्हायरल झाला आहे. महिलेच्या अंगावर गाडी घातल्याचा आरोप करत जमावाने गोंधळ घातला आणि रविनासह तिच्या चालकाला मारहाण केली. व्हायरल व्हिडीओत रविना ‘प्लिज, मारो मत’ म्हणत, जमावाला समजाविण्याचा प्रयत्न करताना दिसते. याप्रकरणी खार पोलिस ठाण्यात घटनेची नोंद करत पोलिस अधिक तपास करत आहेत.
वांद्रे येथील कार्टर रोडवर ही घटना घडली. स्थानिक नागरिकांच्या एका गटाने रविना आणि तिच्या चालकावर, तीन महिलांवर हल्ला केल्याचा आरोप केला आहे. याप्रकरणी अद्याप कुठलाही गुन्हा दाखल करण्यात आला नसून, खार पोलिस ठाण्यात घटनेची नोंद करण्यात आली असल्याचे एका अधिकाऱ्याने सांगितले. या घटनेबाबत रविनाकडून अद्याप काहीही सांगण्यात आलेले नाही. तिच्या वाहनाने कथितपणे तीन जणांना धडक दिली, त्यानंतर जमाव संतप्त झाला आणि त्यामुळे बाचाबाची झाल्याचा आरोप करण्यात आला. रविना जमावाशी बोलण्यासाठी तिच्या वाहनातून बाहेर पडल्यानंतर तिला धक्काबुक्की करत मारण्यात आल्याचे एका पोलिसाने सांगितले. व्हायरल व्हिडीओमध्ये रविना ‘प्लीज, मारू नका’ असे म्हणताना दिसत आहे. दुसरीकडे, व्हिडीओमध्ये मोहम्मद नावाच्या व्यक्तीने आरोप केले आहेत. त्याने म्हटले आहे, ‘वांद्रे परिसरात रविनाच्या इमारतीबाहेर आई, बहीण आणि भाची फिरत असताना ही घटना घडली. रविनाच्या चालकाने माझ्या आईच्या अंगावर गाडी चढवली. त्यानंतर रविनाने गाडीतून उतरून माझ्या भाचीला, अन्य नातेवाईकांना मारहाण केली, तसेच ती नशेत होती.’