‘वर्दी ते लेखणी’ कार्यक्रम
मुलुंड, ता. ३ (बातमीदार) ः
मुंबई पोलिसांची ख्याती जगाच्या नकाशावर पोहोचली आहे. विशेष म्हणजे खाकी वर्दीतही आपली साहित्याविषयीची आस्था जपणाऱ्या वर्दीतल्या दर्दींना ऐकण्यासाठी महाराष्ट्र सेवा संघ मुलुंडतर्फे एक आगळावेगळा कार्यक्रम आयोजित केला आहे. लेखन स्पर्धेतील विजेत्यांच्या पाठीवर कौतुकाची थाप ज्येष्ठ कवी अशोक नायगावकर यांच्याकडून मिळणार आहे. सोबतच त्यांची बहारदार ‘नायगावकरी’ देखील प्रेक्षकांना अनुभवायला मिळणार आहे. हा कार्यक्रम बुधवारी (ता. १२) सायंकाळी सहा वाजता सेवा संघाच्या सभागृहामध्ये होणार आहे. मोफत प्रवेश असून सर्व नागरिकांनी उपस्‍थित राहावे, असे आवाहन आयोजकांनी केले आहे.