आनंदनगर पुलाचे काम कधी?
मालाड, ता. ४ (बातमीदार) ः मेट्रो रेल्‍वेची कामे पूर्ण झाल्‍यानंतर एमएमआरडीए प्राधिकरणाने गेल्‍या मे महिन्यात दहिसर, आनंदनगर येथील आविष्कार बिल्डिंगजवळील उड्डाणपुलाची तात्‍पुरती दुरुस्‍ती केली होती. पावसाळ्यात डांबर, खडी बाहेर आल्‍याने रस्‍ता खराब झाला आहे.
सध्या पुलाच्या देखभालीची जबाबदारी महानगरपालिकेकडे सोपवण्यात आली आहे. प्रशासनाने वर्षभर दुर्लक्ष केल्‍यामुळे दुरुस्तीची कामे रखडली आहेत. आनंदनगर बाजूस पुलाच्या उताराकडे खड्डे पडले आहेत. दरवर्षी पावसाळ्यात या पुलाच्या सखोल भागात कंबरेपर्यंत पाणी भरते. त्‍यामुळे नागरिकांना वाहतूक कोंडीचा सामना करावा लागतो.
यंदाच्या पावसाळ्यात दुर्घटना टाळण्यासाठी पालिका प्रशासनाने आधी रस्‍त्‍याची दुरुस्‍ती करावी. त्‍यानंतर रस्‍ता समतोल करावा, अशी मागणी सामाजिक कार्यकर्ते राजेश पंडया यांनी केली आहे.
आनंदनगर वेल्‍फेअर असोसिएशनचे अध्यक्ष अमिन कर्णा यांनी सांगितले की, पावसाळा जवळ असूनही पालिकेकडून आनंद नगर परिसरातील समस्‍या सोडवलेल्‍या नाहीत. लवकरात लवकर कामे सुरू करा, अन्यथा रास्ता रोको आंदोलन करू, असा इशारा सामाजिक कार्यकर्ते राजेश पंडया यांनी दिला आहे.