मुलुंडमध्ये ‘आर्ट ऑफ गिविंग ३.०’ कार्यक्रम
जुन्या वापरण्यायोग्‍य वस्‍तू जमा करण्याचे आवाहन
मुलुंड, ता. ६ (बातमीदार) ः जागतिक पर्यावरण दिनानिमित्त आयईएस वास्तुशास्त्र महाविद्यालयाचे एनएसएस युनीट व अर्बन सेज ग्रीन क्लब, स्वत्व, मी मुलुंडकर प्रतिष्ठान, स्त्री मुक्ती संघटना व परिसर भगिनी विकास संघ यांच्या संयुक्त विद्यमाने ‘आर्ट ऑफ गिविंग ३.०’ हा उपक्रम दिनांक बुधवार (ता.५) ते बुधवार (ता. १२) दरम्यान मुलुंडमध्ये राबविण्यात येत आहे
विशेष म्हणजे जुन्या वापरण्यायोग्य वस्तू नीट पॅक करून या संस्थेला देण्यात याव्यात, असे आवाहन आयोजकांनी केले आहे. भगिनी विकास संघामार्फत कचरावेचक भगिनी आणि इतर गरजू कुटुंबांपर्यंत या उपयुक्त वस्तू पोहाेचवण्यात येणार असल्याची माहिती ‘मी मुलुंडकर’ संस्थेच्या अध्यक्षा मयुरा बाणावली यांनी दिली.
वस्तूंचा पुनर्वापर आणि गरजवंतांना मदत करण्यासाठी हा उपकम राबवण्यात येत आहे. पुनर्वापर हा पर्यावरण संवर्धनाच्या दृष्टीने एक महत्त्वाचा भाग आहे. या उपक्रमात सर्व पर्यावरणप्रेमी नागरिकांनी सहभागी व्हावे, आपल्या वसुंधरेचे रक्षण करावे, असे आवाहन मयूरा बाणावली यांनी केले आहे. सकाळी १० ते दुपारी १ आणि सायंकाळी ५ ते ९ या कालावधीमध्ये ‘मी मुलुंडकर प्रतिष्ठान’ यांच्या मुलुंड पूर्वेतील कार्यालयामध्ये वस्‍तू जमा करता येतील.