पालिकेच्या अभियंत्यावर निलंबनाची कारवाई

वेसावेतील अनधिकृत बांधकामांकडे दुर्लक्ष; आयुक्तांच्या निर्देशांचे अवमानप्रकरणी कारणे दाखवा नोटीस

सकाळ वृत्तसेवा
मुंबई, ता. ७ : अंधेरीच्या के पश्चिम विभागांतर्गत वेसावे (वर्सोवा) येथे सागरी किनारा क्षेत्रात अनधिकृत बांधकामांवर दुर्लक्ष केल्याप्रकरणी दुय्यम अभियंता सोमेश शिंदे यांच्यावर निलंबनाची कारवाई करण्यात आली आहे; तर पदनिर्देशित अधिकारी स्वप्नील कोळेकर यांचीही बदली करण्यात आली. सोबतच पालिका आयुक्तांच्या समक्ष बैठकीस उपस्थित राहण्याची सूचना दिल्यानंतरही गैरहजर राहून निर्देशांचे उल्लंघन केल्याबद्दल शिंदे यांना कारणे दाखवा नोटीसही बजावण्यात आली आहे. प्रशासकीय कामकाज आणि जबाबदाऱ्या यामध्ये कोणीही बेजबाबदारपणा, दुर्लक्ष आणि निष्काळजीपणा करू नये, अन्यथा त्यांनाही कठोर कारवाईला सामोरे जावे लागेल, असा इशारा आयुक्त भूषण गगराणी यांनी दिला आहे.

अंधेरी विभागात २०२२ पासून कार्यरत असलेले दुय्यम अभियंता सोमेश शिंदे यांच्याकडे प्रभाग क्रमांक ५९, ६० आणि ६३ यांचा कार्यभार सोपवण्यात आला होता. प्रभाग क्रमांक ५९ आणि ६३ यामध्ये अनधिकृत बांधकामे, अनधिकृत फेरफार, जमिनीवरील बांधकामे, विशेषतः वेसावे येथे सागरी किनारा क्षेत्र व्यवस्थापन परिसरात व दलदलीच्या जमिनीवर अनधिकृत बांधकामांविषयी प्रशासनाकडे मोठ्या प्रमाणात तक्रारी प्राप्त होत होत्या. याप्रकरणी सहआयुक्त विश्वास शंकरवार आणि के पश्चिम विभागाचे सहायक आयुक्त डॉ. पृथ्वीराज चौहान यांनी दखल घेत कारवाईच्या सूचना सोमेश शिंदे यांना दिल्या होत्या. त्यातच वेसावे भागातील अनधिकृत बांधकामांविषयी पालिका आयुक्त आणि अतिरिक्त आयुक्त यांना सविस्तर माहिती देऊन निष्कासनाची कारवाई ३ जून रोजी नियोजित करण्यात आली, मात्र यावेळी निर्देश मिळाल्यानंतरही शिंदे यांनी निष्कासनासाठी कोणतीही तयारी केली नाही. यामुळे पालिकेने शुक्रवारी (ता. ६) शिंदे यांच्यावर ही कारवाई केली.

..
खाते अंतर्गत चौकशी
वेसावे भागातील अनधिकृत बांधकामांवर ३ व ४ जून रोजी प्रत्यक्ष निष्कासन कारवाई सुरू असताना सोमेश शिंदे यांनी निष्क्रियता दाखवली. या कारवाई वेळी शिंदे हे खासगी वाहनात वातानुकूलन यंत्रणा सुरू करून बसून होते. या सर्व प्रकाराची दखल घेत पालिका प्रशासनाने शिंदे यांच्यावर खाते अंतर्गत चौकशी पूर्ण होईपर्यंत निलंबनाची कावाई केली.

.......