दुभाजकावरील विद्युत रोषणाई बंद
विद्युत विभागाचे देखभालीकडे दुर्लक्ष
कांदिवली, ता. ८ (बातमीदार) ः कांदिवलीत स्वामी विवेकानंद मार्ग आणि महात्मा गांधी या मुख्य मार्गांवर दुभाजकामधील विजेच्या खांबांवर केलेली विद्युत रोषणाई बंद पडली आहे. महापालिकेच्या विद्युत विभागाने रोषणाईच्या देखभालीकडे लक्ष द्यावे, अशी मागणी नागरिकांनी केली आहे.
या मुख्य मार्गांवरील नक्षीदार विद्युत रोषणाई कुठे अर्धी सुरू आहे, तर कुठे पूर्ण बंद पडली आहे. मुंबई सुशोभिकरण प्रकल्पांतर्गत चौक, नाके, रस्ते आणि सिग्नलवर लाखो रुपये खर्च करून नूतनीकरण करण्यात आले आहे. दुभाजकांमधील विजेच्या खांबांवर मोराची नक्षी असलेली विद्युत रोषणाई करण्यात आली आहे. त्‍यामुळे मुख्य मार्ग आकर्षक दिसत होते. मात्र, वर्षभरातच विद्युत रोषणाई बंद पडली. पालिकेने दुर्लक्ष केल्याने लाखो रुपये खर्च करून केलेली विद्युत रोषणाई कुचकामी ठरत आहे. सुशोभिकरण केलेल्या बहुतांशी कामाची दयनीय अवस्था झाली आहे. येथील विद्युत रोषणाईची पाहणी करण्यात येईल, अशी प्रतिक्रिया विद्युत विभागाचे अभियंता ए. चिंचोळे यांनी दिली.