स्वयं पुनर्विकासासाठी सोसायट्यांनी पुढाकार घ्यावा
मुलुंड, ता. ९ (बातमीदार) ः मुलुंड पूर्वेतील टाटा कॉलनी येथे स्‍वयं पुनर्विकास योजनेंतर्गत पूर्वरंग सहकारी गृहनिर्माण संस्था या सोसायटीला माजी नगरसेवक आणि मुंबई डिस्ट्रिक्ट को-ऑपरेटिव्ह हौसिंग फेडरेशनचे अध्यक्ष प्रकाश गंगाधरे यांनी भेट दिली. या सोसायटीच्या सदस्यांनी स्वयं पुनर्विकास प्रकल्प बांधून अनेक सोसायटींना आदर्श दिला आहे. विशेष म्हणजे, सोसायटी सभासदांची आधी ४०० चौरस फुटाची सदनिका होती. आता ती एकूण १,००० चौरस फुटाची झाली असून यामध्ये अत्याधुनिक सुख-सुविधा पुरविण्यात आल्या आहेत, असे ते म्‍हणाले. गृहनिर्माण संस्थांनी स्वयं पुनर्विकासासाठी पुढाकार घ्यावा, असे आवाहन गंगाधरे यांनी केले. पूर्वरंग सोसायटीने घेतलेल्या निर्णयामुळे सर्व सदस्यांना मोठी जागा राहायला मिळाली. ही बाब कौतुकास्पद असल्‍याचे त्‍यांनी सांगितले. याप्रसंगी माजी नगरसेवक नंदकुमार वैती, सोसायटी सेक्रेटरी मिलिंद महाडिक, सभासद राकेश गायकवाड, बाळकृष्ण दुमने, दिगंबर नाईक उपस्थित होते.