सकाळ वृत्तसेवा 
मुंबई, ता. ९ : छत्रपती शिवाजी महाराज आंतरराष्ट्रीय विमानतळावर दोन विमानांमधील टक्कर थोडक्यात टळल्याची घटना उघडकीस आली आहे. ज्या धावपट्टीवर इंडिगोचे विमान उतरत होते, त्याच धावपट्टीवरून एअर इंडियाच्या विमानाने मिनिटाआधी उड्डाण केले. या वेळी दोन्ही विमाने खूप जवळ आल्याने काहीवेळ हृदयाचा ठोका चुकला. शेकडो प्रवाशांचा जीव धोक्यात घातल्याप्रकरणी नागरी हवाई वाहतूक महासंचालनालयाने (डीजीसीए) तातडीने चौकशी सुरू केली आहे.
छत्रपती शिवाजी महाराज आंतरराष्ट्रीय विमानतळावरील धावपट्टीवर शनिवारी पहाटे काळजाचा ठोका चुकवणारी ही घटना धावपट्टी क्रमांक २७वर घडली. इंदूरहून आलेले इंडिगोचे विमान धावपट्टीवर उतरले, त्याच वेळी एअर इंडियाच्या विमानाने तिरुअनंतपूरमकडे उड्डाण केले. विमानांच्या लँडिंग आणि टेकऑफमध्ये खूप कमी वेळ मिळाल्याने गोंधळाची स्थिती निर्माण झाली होती.
इंडिगोने दिलेल्या निवेदनात म्हटले आहे की, इंदूर-मुंबई विमानाच्या वैमानिकाने ‘एटीसी’च्या सूचनांचे पालन केले. ८ जूनला इंदूरहून निघालेल्या इंडिगोच्या ‘६ ई ६०५३’ या विमानाला एटीसीने मुंबई विमानतळावर लँडिंग क्लीअरन्स दिले होते. ‘पायलट इन कमांड’ने अप्रोच आणि लँडिंग चालू ठेवले आणि ‘एटीसी’च्या सूचनांचे पालन केले. इंडिगोमध्ये प्रवाशांची सुरक्षा आमच्यासाठी सर्वोच्च असून आम्ही प्रक्रियेनुसार या घटनेची माहिती दिली आहे.
----
‘एटीसी’चे अधिकारी, कर्मचारी निलंबित
नागरी हवाई वाहतूक महासंचालनालयाने (डीजीसीए) तातडीने कारवाई करून एअर ट्रॅफिक कंट्रोल विभागाचे (एटीसी) अधिकारी व कर्मचाऱ्यांना निलंबित केले आहे. तसेच सुरक्षा नियमांचे उल्लंघन झाल्याच्या प्रकाराची चौकशी सुरू केली आहे.