सकाळ वृत्तसेवा
डोंबिवली, ता. १० : मलंगगड पट्ट्यात पहिल्याच पावसात घरावर दरड कोसळून एकाचा मृत्यू झाला आहे. सोमवारी सकाळी सहा वाजण्याच्या सुमारास ही घटना घडली असून दीड वर्षाच्या मुलाला वाचवताना पित्याचा मात्र जीव गेला आहे.
अंबरनाथ तालुक्यातील मलंगगड परिसरातील घरांना पावसाळ्यात नेहमीच दरडीचे सावट असते. गेल्या वर्षीही पावसाळ्यात दरड कोसळून एका घराचे नुकसान झाले होते. त्यानंतर गावकऱ्यांनी दगड खाली येण्याचा धोका असलेल्या ठिकाणांवर ताडपत्री, प्लास्टिकचे कागद लावले होते. तरीदेखील पहिल्याच पावसात मलंगगड परिसरात दरड कोसळण्याची घटना घडली आहे. या घटनेत गुलाम सय्यद (वय ३०) यांचा मृत्यू झाला आहे. तर त्यांची पत्नी व मुलावर उल्हासनगर येथील मध्यवर्ती रुग्णालयात उपचार सुरू आहेत.
--------------------------------------------
भूसुरुंग स्फोटांमुळे धोका
मलंगगड डोंगराच्या पाठीमागे काही दिवसांपूर्वी जेएनपीटी-वडोदरा महामार्गाच्या टनेलसाठी भूसुरुंग स्फोट करण्यात आले होते. त्याचे हादरे डोंगराला बसल्याने ही घटना घडल्याचे स्थानिकांचे म्हणणे आहे. तसेच अनधिकृत बांधकामे, वन विभागाच्या जागेवरील अतिक्रमणांकडे प्रशासनाचे दुर्लक्ष होत असल्याने नागरिकांनाही जीव धोक्यात घालून वास्तव्य करावे लागत आहे.