धारावीकरांचे पुनर्वसन मुलुंडमध्ये नको!
प्रयास सामाजिक संस्थेची मागणी
घाटकोपर, ता. ११ (बातमीदार) ः धारावीकरांचे पुनर्वसन मुलुंडमध्ये न करण्याबाबत मुलुंडकरांनी विरोध कायम दर्शवला असून मुलुंडमधील कार्यरत प्रयास सामाजिक संस्थेचे अध्यक्ष ॲड. सागर देवरे यांनी ईशान्य मुंबईचे खासदार संजय दिना पाटील यांची भेट घेऊन यासंदर्भात निवेदन दिले. धारावीकरांचे पुनर्वसन मुलुंडमध्ये करू नका आणि पीएपी प्रकल्प रद्द करा, अशी मागणी संस्थेच्या वतीने करण्यात आली आहे. याबाबत केंद्र सरकारकडे पाठपुरावा करणार असून पीएपीबाबत पुनर्विचार करण्यात यावा, यासाठी मुंबई पालिका आयुक्तांना निवेदन देऊ, असे पाटील म्हणाले. मुलुंडकरांना विश्वासात न घेता परस्पर पुनर्वसन प्रकल्प सुरू ठेवल्यास रस्त्यावर उतरून आंदोलन करू, असा इशारा यावेळी खासदार संजय दिना पाटील यांनी दिला. दरम्यान, मिठागराची जागा धारावीकरांच्या पुनर्वसनासाठी देण्यात येऊ नये, यासाठी मिठागर विभाग व केंद्र सरकारकडे आक्षेप नोंदविण्यास येणार असल्याचे पाटील यांनी सांगितले. यावेळी निवेदन देताना प्रयास संस्थेचे अध्यक्ष ॲड. सागर देवरे यांच्यासह सर्व पदाधिकारी उपस्थित होते.