सकाळ वृत्तसेवा
ठाणे, ता. २ : मुख्यमंत्र्यांचे बदलते ठाणे या उपक्रमांतर्गत पावसाळ्यात ठाणेकरांना खड्डेमुक्त प्रवास करता यावा, यासाठी शेकडो कोटी रुपये खर्च करून रस्त्यांची कामे करण्यात आली. त्यामुळे काही अंशी येथील नागरिकांना दिलासा मिळाला आहे. असे असले तरी उड्डाणपुलांवर पडलेले खड्डे वाहनचालकांची डोकेदुखी ठरू लागली आहे. त्यात हे खड्डे चुकवताना अपघाताला निमंत्रण मिळण्याची शक्यताही वर्तवण्यात येत आहे.
मागील वर्षाप्रमाणे यंदाही पावसाळा आणि खड्डे हे समीकरण जुळून आले आहे. यावर्षी अद्याप हवा तसा पाऊस पडला नाही, तरी ठाणे शहरातून जाणाऱ्या विविध प्राधिकरणाच्या उड्डाणपुलांवर खड्डे पडण्यास सुरुवात झाली आहे. ठाण्यातील कापुरबावडी, माजिवडा उड्डाणपुलांवर खड्डे पडल्याचे दिसून आले होते. त्यानंतर दोनच दिवसांपूर्वी सार्वजनिक बांधकाम विभागाने येथील खड्डे बुजवले. मात्र, त्यावर तात्पुरता दिलेला मुलामा आता काहीच उपयोगी ठरत नसल्याचे स्पष्ट झाले आहे. या पुलांवर पुन्हा खड्डेच खड्डे असे चित्र दिसत आहे. त्यातही विवियानाकडून घोडबंदरकडे जाताना माजिवडा उड्डाणुपलावर मोठमोठे खड्डे पडलेले आहेत. त्यात पावसाचे पाणी साचत असल्याने दुचाकीस्वारांना या खड्ड्यांचा अंदाजच येत नाही. परिणामी, गाडी आदळून आणि दुचाकीचालकाचा तोल जाऊन दुर्घटना घडण्याची शक्यता नाकारता येत नाही. सार्वजनिक बांधकाम विभागाने खड्डे बुजवण्यास सुरुवात केली आहे.

खडीवरून दुचाकीस्वारांची घसरण
एमएसआरडीसीच्या ताब्यात असलेल्या नितीन कंपनी उड्डाणपुलावरही खड्डे पडण्यास सुरुवात झाली आहे. त्यावर सिमेंटचे खडी मिश्रीत मटेरीयल टाकले जात आहे. परंतु तेदेखील वाहून जात आहे. त्यामुळे या खडीवरून दुचाकीस्वार घसरत असल्याचे चित्र आहे.

वाहतुकीचा वेग मंदावला
तीनहात नाक्यावरील खालील बाजूच्या रस्त्यावरही खड्डे पडू लागल्याचे दिसत आहे. त्यामुळे महापालिका हद्दीतील रस्त्यांवर नाही; परंतु इतर प्राधिकरणांच्या रस्त्यांवर खड्डेच खड्डे पडत आहेत. मुंबई-नाशिक महामार्गही खड्ड्यांमध्ये गेल्याने वाहतुकीचा वेग मंदावला आहे.