मलेरिया रुग्णांची फोनवरून घेणार माहिती
वॉर्डस्तरावर रुग्णांवर लक्ष ठेवणार, पालिकेची मलेरिया सर्व्हिलन्स टीम तयार
सकाळ वृत्तसेवा
मुंबई, ता. २ : मुंबईत माॅन्सून दाखल झाला आहे. पावसाळ्यात मलेरिया, डेंगीचे रुग्णही वाढू लागले आहेत. रुग्‍णांची संख्या रोखण्यासाठी महापालिकेच्या आरोग्य विभागाने विविध उपाययोजना आखल्या आहेत. यासाठी प्रभागस्तरावर ‘मलेरिया सर्व्हिलन्स टीम’ तयार केली आहे. ही टीम मलेरिया रुग्णांच्या आरोग्यासाठी केवळ फोनवरूनच नव्हे तर, त्यांच्या घरी जाऊन निरीक्षण करेल. ते नियमितपणे औषधे घेत आहेत की नाही, हेदेखील जाणून घेईल.
पावसाळ्यात मुंबईकरांना कोणत्याही अडचणींचा सामना करावा लागू नये, यासाठी मुंबई महापालिकेने दोन महिने आधीच तयारी सुरू केली आहे. महापालिकेच्या आरोग्य विभागाच्या कार्यकारी आरोग्य अधिकारी डॉ. दक्षा शहा यांनी सांगितले की, पावसाळ्यातील आजारांना विशेषत: डेंगी, मलेरियाचा सामना करण्यासाठी आरोग्य विभागाने चोख व्यवस्था केली आहे. मलेरिया पॉझिटिव्ह रुग्‍ण आढळल्‍यानंतर १४ दिवसांचा उपचार कोर्स पूर्ण करावा लागतो. मात्र, खासगी रुग्णालयात उपचार घेत असलेले रुग्ण अनेकदा कोर्स पूर्ण करत नाहीत. त्यामुळे अशा रुग्णांवर वॉर्डस्तरावर लक्ष ठेवण्यात येणार आहे. रुग्‍ण नियमित औषध घेतात की नाही, हे या फोनद्वारे टीमला जाणून घेता येईल. आठवड्याच्या प्रत्येक तिसऱ्या दिवशी ही टीम रुग्णांच्या घरी जाऊन त्यांच्या प्रकृतीची चौकशी करेल.

मलेरियाचा कोर्स पूर्ण न केल्यामुळे रुग्ण पूर्णपणे बरा होऊ शकत नाही. रुग्णाचे रक्त शोषल्यानंतर डास दुसऱ्या व्यक्तीला दंश करत असेल तर त्यालादेखील संसर्ग होऊ शकतो.
-डॉ. दक्षा शहा, कार्यकारी अधिकारी, महापालिका आरोग्य विभाग

या भागांवरही लक्ष
पावसाळ्यात मलेरिया आणि डेंगीचा सामना करण्यासाठी सूक्ष्म आराखडा तयार करण्यात आला आहे. ज्या भागात मलेरिया आणि डेंगीचे जास्त रुग्ण आढळून येत आहेत, त्या ठिकाणी आरोग्य विभाग लक्ष ठेवून आहे.

मुंबईत मलेरियाचे २,४८४ रुग्ण
राज्याच्या आरोग्य विभागाकडून मिळालेल्या आकडेवारीनुसार, जानेवारी ते २१ जूनपर्यंत मुंबईत मलेरियाचे दोन हजार ४८४ रुग्ण आढळले आहेत. तर गेल्यावर्षी याच कालावधीत मुंबईत एक हजार ८०८ रुग्ण आढळले होते. या आकड्यांचे मूल्यांकन केल्यास गेल्या वर्षी मुंबईत दररोज २५ मलेरियाचे रुग्ण आढळले होते, जे २०२४ मध्ये ३५ पर्यंत वाढले आहेत.