मुंबई : १९९३ च्या दंगलीतील फरार आरोपीला रफी अहमद किडवई मार्ग पोलिसांनी तब्बल ३१ वर्षांनी अटक केली आहे. सय्यद नादिर शहा अब्बास खान असे या आरोपीचे नाव असून शनिवारी त्याला अटक करण्यात आली.
कोल्हापूर येथे ओळख बदलून वास्तव्य करणाऱ्या खानची माहिती किडवई मार्ग पोलिसांना मिळाली होती. पोलिसांचे पथक कोल्हापूरला जाण्यापूर्वीच शिवडीतील त्याच्या कुटुंबीयांना खान भेटण्यासाठी येणार असल्याची गोपनीय माहिती मिळाली. त्यानुसार शनिवारी सापळा रचत खानला ताब्यात घेण्यात आले. दंगल, सामाईकरीत्या हत्येचा प्रयत्न आदी कलमांनुसार खान याला यापूर्वीही अटक करण्यात आली होती. मात्र, जामीन मिळाल्यानंतर फरारी असल्याने सत्र न्यायालयाने त्याच्याविरोधात अजामीन पात्र वॉरंट बजावल्याची माहिती किडवई मार्ग पोलिस ठाण्याचे प्रभारी पोलिस निरीक्षक सतीश पवार यांनी दिली.