मुंबई, ता. २ ः एसटी कर्मचाऱ्यांचे प्रश्न सोडवण्यासाठी विलिनीकरणाशिवाय पर्याय नाही. त्यामुळे कुठल्याही नियमांत बसवा, अशी मागणी महाराष्ट्र एसटी कर्मचारी काँग्रेसचे अध्यक्ष आमदार भाई जगताप यांनी केली आहे. दादरच्या टिळक भवन येथील कामगारांच्या प्रशिक्षण शिबिरात ते बोलत होते. ज्या कर्मचाऱ्यांमुळे एसटीची भरभराट झाली. त्यांना ७६ वर्षांनंतरसुद्धा शासकीय कर्मचाऱ्यांप्रमाणे वेतन, वेळेवर महागाई भत्ता मिळत नाही. तसेच कामगारांसाठी कोणकोणती परिपत्रके आहेत, याचीही माहिती दिली जात नाही. त्यामुळे प्रस्थापित पुढारी व प्रशासन दोघेही या परिस्थितीला जबाबदार असून वेतनवाढीच्या मागणीसाठी पुढाऱ्यांना जाब विचारला पाहिजे, असे मत त्यांनी व्यक्त केले.