मुंबई, ता. २ ः गोरेगाव पूर्व-पश्चिम जोडणाऱ्या उड्डाणपुलावरून पडून दोन दुचाकीस्वारांचा मृत्यू झाला. सोमवारी पहाटे झालेल्या या अपघाताची गोरेगाव पोलिस ठाण्यात नोंद आहे. गोरेगावचे रहिवासी असलेले वैभव गमरे आणि आनंद इंगळे दुचाकीवरून पूर्व-पश्चिम उड्डाणपुलावरून भरधाव वेगाने जात होते. एका ठिकाणी त्यांची दुचाकी अनियंत्रित झाल्याने बॅरिकेड्सला धडकली. त्यामुळे दोघेही पुलावरून एमटीएनएल चौकात पडले. अपघातानंतर त्यांना जोगेश्वरी येथील ट्रामा सेंटर येथे नेण्यात आले. मात्र, त्यापूर्वीच डॉक्टरांनी त्यांना मृत घोषित केले.