ठाण्यात फसवणुकीचे एकाच दिवशी तीन गुन्हे

ठाणे, ता. ३ (वार्ताहर) : मोबाईल खरेदीसाठी धनादेश देत एक लाख ७७ हजारांचा गंडा घातल्याप्रकरणी ठाण्यात पती-पत्नीविरोधात पोलिसात तक्रार दाखल करण्यात आली आहे. तसेच, बनावट नोंदणी दस्त देऊन शासनाची फसवणूक व बिल्डरद्वारे फ्लॅट बुकिंगमध्ये फसवणूक केली आहे, असे नौपाडा पोलिस ठाण्यात तीन गुन्हे दाखल करण्यात आले आहेत.
ठाण्याच्या एम. जी. रोडवर असलेल्या महालक्ष्मी टेलिकॉम मोबाईल विक्रीच्या दुकानात मोबाईल खरेदीसाठी आलेल्या राजीव व निता नागवेकर यांनी मोतीराम जोगाजी देवासी (वय ३८) यांच्याकडून एक लाख ७७ हजाराचे दोन मोबाईल जानेवारीमध्ये खरेदी केले होते. त्यावेळी त्यांना धनादेश दिला होता, मात्र तो वटला नाही. त्यानंतर त्यांनी रोख रक्कम आणून देतो, असे सांगून पैसे देण्यास टाळाटाळ केल्यामुळे त्यांच्याविरोधात देवासी यांनी तक्रार दाखल केली. तर दुसऱ्या घटनेत संतोष महादेव तायडे यांनी शासनाची फसवणूक केल्याप्रकरणी दत्तात्रय भोसले व बिल्डर प्रल्हाद कणसे या दोघांविरोधात गुन्हा दाखल केला आहे. फसवणुकीच्या तिसऱ्या घटनेत चाळीस वर्षीय महिला सेसलीन अनिता मेरी सेल्वकुमार यांना एका गुंठ्यामध्ये एका वर्षाच्या आत टू बीएचके बांधून देणार असल्याचे सांगितले. मात्र, त्यांनी दीड लाखाची रक्कम देऊनही त्यांना घर बांधून देण्यात आले नाही. याप्रकरणी कृष्णमूर्ती गणेश याच्याविरोधात फसवणुकीचा गुन्हा दाखल केला आहे.