राज्य मार्गावर मोकाट जनावरांचे ठाण
कासा-डहाणू रस्ता त्रासदायक; अपघातांचे प्रमाण वाढले

कासा, ता. ३ (बातमीदार) : डहाणू-नाशिक राज्य मार्गांवर पावसाळा सुरू होताच डहाणू ते चारोटीदरम्यान अनेक ठिकाणी मोकाट गुरांनी रस्त्यावर ठाण मांडले आहे. त्यामुळे वाहनचालकांना नाहक त्रास होत आहे. रस्त्यावरील वाहनांमुळे अनेक वेळा अपघातही होत आहेत. त्यामुळे यावर तत्काळ उपाययोजना करावी, अशी मागणी वाहनचालकांतून होत आहे.
कासा ते डहाणू या जवळपास पंचवीस किलोमीटर अंतरावर दहा ते बारा ठिकाणी मोकाट गुरांचे कळप रस्त्यावर बसत आहेत. या जनावरांमुळे वाहतुकीला मोठा अडथळा होत आहे.
प्रामुख्याने कासा, चारोटी, सारणी, रानशेत, गंजाड, कांदोळपाडा, आशागड, संतोषी मंदिर, सावटा या परिसरातील मुख्य रस्त्यावरही गुरांची समस्या निर्माण झाली आहे. रात्रीच्या वेळी ही समस्या निर्माण झाल्याने प्रवास कसा करावा, असा सवाल उपस्थित केला जात आहे.
यासाठी बांधकाम विभाग, ग्रामपंचायत प्रशासन व पोलिस प्रशासन यांनी एकत्रित येऊन त्यावर उपाययोजना करावी, अशी मागणी वाहनचालक करत आहेत.

पावसाळ्यात मोकाट जनावरांचा रस्त्यावर वावर वाढल्याने याबाबत गटविकास अधिकारी यांच्याशी बोलून चर्चा केली आहे. त्यासाठी ग्रामपंचायतींबरोबर बोलून त्यावर तोडगा काढण्यासाठी प्रयत्न केला जाणार आहे.
- अभिजित देशमुख, तहसीलदार, डहाणू

कोट -
मोकाट जनावरांच्या कळपाचा फक्त वाहनधारकांनाच त्रास होतो असे नाही, तर अपघात झाल्यामुळे त्याचा फटका जनावरांनाही बसत आहे. मोठ्या वाहनांच्या धडकेत कधी कधी जनावरांचा जीवही जाण्याची शक्यता आहे. त्यामुळे या जनावरांचा बंदोबस्त करणे गरजेचे आहे.
- निवास वरठा, सामजिक कार्यकर्ता, वाहनचालक

कासा ः रस्त्यांवर ठाण मांडून बसलेली मोकाट गुरे.