कल्याण पूर्वमध्ये मतदार नोंदणी अभियान
कल्याण, ता. ४ (वार्ताहर) : नुकत्याच पार पडलेल्या लोकसभा निवडणुकीत ऐन निवडणुकीच्या दिवशी कल्याण पूर्व विधानसभा मतदारसंघातील सुमारे ८० हजार मतदारांची नावे गायब झाल्याची बाब निदर्शनास आली होती. याच पार्श्वभूमीवर शिवसेना उद्धव बाळासाहेब ठाकरे पक्षाचे जिल्हा समन्वयक हर्षवर्धन पालांडे यांनी मतदार नाव नोंदणी अभियान राबविले आहे. कल्याण पूर्वमध्ये हे मतदार नाव नोंदणी अभियान राबविले जात आहे. या अभियानाचा प्रारंभ बुधवारी ठाकरे गटाच्या कोळसेवाडी येथील मध्यवर्ती शाखेतून करण्यात आला.
यावेळी हर्षवर्धन पालांडे यांच्यासह माजी महापौर रमेश जाधव, शहरप्रमुख शरद पाटील, नारायण पाटील, हेमंत चौधरी, शांताराम दिघे, चंद्र प्रसाद, सूर्यकांत मोरे, जगदीश तरे, तुळशीराम म्हात्रे, मीना माळवे, साधना पार्टे, संगीता गांधी, दीपाली जाधव, अक्षदा कदम, संध्या केळमकर आदी पदाधिकारी उपस्थित होते.
लोकसभा निवडणुकीत ज्या मतदारांची मतदार यादीतून नावे अचानकपणे गायब झाली आहेत, अशा मतदारांना आपले नाव मतदार यादीत समाविष्ट करून घेण्यासाठी ही संधी उपलब्ध करून देण्यात आली असल्याची माहिती यावेळी पालांडे यांनी दिली. यावेळी माजी महापौर रमेश जाधव यांनी निवडणूक आयोगाच्या गलथान कारभारामुळेच मतदारांची नावे यादीतून गायब झाल्याचे सांगितले, तसेच शहरप्रमुख शरद पाटील यांनी या अभियानाचा जास्तीत लाभ घेण्याचेही आवाहन केले आहे.