पोक्सो गुन्ह्यातील दोघांना २० वर्षांचा कारावास
ठाणे सत्र न्यायालयाचा निकाल, धमकी देऊन अत्याचार

ठाणे शहर, ता. ४ (बातमीदार) : अल्पवयीन मुलीला जिवे मारण्याची धमकी देऊन तिच्यावर बलात्कार करणाऱ्या दोघांना ठाणे सत्र न्यायालयाने २० वर्षांच्या सक्तमजुरीची शिक्षा ठोठावली आहे. या गुन्ह्यातील आरोपींची नावे नरेश विखे आणि विजय तांबे अशी असल्याचे पोलिसांनी सांगितले. राबोडी पोलिस ठाण्याच्या हद्दीत पाच वर्षांपूर्वी हा गुन्हा घडला होता.

कळवा येथे राहणाऱ्या बारा वर्षीय मुलीला खाऊचे आमिष दाखवून साकेत येथील नाना-नानी पार्क परिसरातील पाईपलाईन येथील झोपडपट्टीत घेऊन जाऊन नरेश अशोक विखे ऊर्फ दादू (वय २७) आणि विजय बाबासाहेब तांबे ऊर्फ विजू (वय २५) यांनी अत्याचार केला होता. काही दिवसांनी तिला पुन्हा धमकी देऊन दोघांकडून पुन्हा अत्याचार करण्यात आला होता. ही घटना घडल्यानंतर मुलीने घडलेला प्रकार कुटुंबीयांना सांगितला व ९ डिसेंबर २०१९ रोजी राबोडी पोलिसांत याप्रकरणी गुन्हा दाखल करण्यात आला. गुन्हा दाखल होताच दोघांनाही पोलिसांनी ताब्यात घेऊन आरोपींविरोधात दोषारोपपत्र न्यायालयात दाखल केले. त्यावर शनिवारी (ता. २९) अंतिम सुनावणी झाली. पोक्सो न्यायालयाकडून न्यायालयात सादर केलेले साक्षी पुराव्यांना ग्राह्य मानून दोघांनाही २० वर्षांच्या सश्रम कारावासाची शिक्षा ठोठावून २६ हजार रुपयांचा दंड करण्यात आला. या दंडाची रक्कम न भरल्यास शिक्षेत आणखी एक वर्षाची वाढ होईल, असेही आदेश न्या. मालवणकर यांनी दिले. या गुन्ह्याचा तपास महिला पोलिस उपनिरीक्षक पद्मजा यादव यांनी केला होता.