बांधकामाचे साहित्य रस्त्यावर
कांदिवली पूर्वेत वाहनचालक; प्रवासी हैराण
कांदिवली, ता. ४ (बातमीदार) ः कांदिवली पूर्वेला द्रुतगती मार्गावर समता नगर पादचारी पुलाशेजारी बस थांबा आहे. या बस थांब्‍याशेजारी बांधकामाचे साहित्‍य, रेतीचे ढिगारे साचल्‍याने प्रवाशांची गैरसोय सुरू आहे.
प्रवाशांना द्रुतगती मार्गावर उभे राहून बसची वाट पहावी लागते. पालिकेने आणि संबंधित विभागाने तातडीने स्वच्छता करून प्रवाशांना होणारी गैरसोय दूर करावी, अशी मागणी प्रवासी करीत आहेत.
एसटी, बेस्ट, खाजगी बस थांबा इथे असल्‍याने प्रवाशांची नेहमीच गर्दी असते. मात्र, बस थांब्याकडे येणाऱ्या मार्गावर पादचारी पुलाच्या बाजूला खडी, तुटलेल्या लाद्या, रेती, म्हाडाच्या बांधकामाच्या टाक्या रस्त्यावरच असल्याने पावसात प्रवाशांचे हाल होत आहेत. इथे एखाद्या अपघाताची भीती वर्तवण्यात येत आहे. बस थांब्याच्या पाठीमागे डोंगर आहे. म्हाडा व्यवस्थापनाकडून या डोंगरावर खोदकाम करून तटभिंती बांधण्याचे काम पावसाळ्यात थांबविण्यात आले आहे. मात्र बांधकामातील साहित्य बस थांब्‍यालगत ठेवण्यात आले आहे.