पालिकेच्या शाळेत विद्यार्थ्यांना निकृष्ट पोषण आहार?
दिवा, ता. ४ (बातमीदार) : महापालिकेच्या शाळेत दिले जाणारे जेवण हे निकृष्ट दर्जाचे असल्याचा आरोप करत पालकांनी शाळेत जाऊन जेवण तपासले. तसेच ते जेवण निकृष्ट दर्जाचा असल्याचा आरोप पालिकांना केला. या वेळी दिवा पालिका शाळेतील विद्यार्थ्यांचे १० ते १५ पालक उपस्थित होते.
महापालिकेची शाळा सुरू होऊन अवघे १९ दिवस झाले आहेत; मात्र शाळेतील जेवण चांगले नसल्याच्या विद्यार्थ्यांच्या तक्रारी वाढल्याने गुरुवारी (ता. ४) पालकांनी जेवणाची तपासणी केली. तेथे जेवण तपासले असता डाळीला फेस आल्याचे त्यांना आढळले; तर भात कच्चा शिजलेला होता. तसेच तेथे लहान मुलांना देण्यात येणाऱ्या लाडवाच्या पाकिटावर एक्सपायरी डेट नसल्याचा आरोप पालिकांनी केला.
जेवण बनवताना एका निळ्या टाकीतील अशुद्ध पाणी वापरले जाते. डाळ, उसळसाठी पाम तेलाचा वापर केला जात आहे; तर भातही कच्चा शिजवला जातो. हे असे निकृष्ट दर्जाचे अन्न खाऊन मुले आजारी पडत आहेत. दिव्यातील पालिका शाळेत निकृष्ट जेवण देऊन आमच्या विद्यार्थ्यांच्या आरोग्याशी खेळ सुरू असल्याचा आरोप पालिकांनी केला. तसेच जेवणात याआधीही केस, झुरळ, भांडी घासायच्या काथ्याची तार सापडल्याने काही मुले शाळेतील जेवतच नाहीत. यावर पालकांनी शिक्षकांकडे तक्रार केल्यावर आम्ही ठेकेदाराला सांगतो, इतके उत्तर शाळा प्रशासनाकडून दिले जाते. या निकृष्ट जेवणामुळे मुलांमध्ये पोटदुखी, उलटी, जुलाब, घशाला खवखव होणे, मळमळणे असे आजार होत असल्याचे पालकांचे म्हणणे आहे. या वेळी श्रावणी कदम, जानवी परब, सुवर्णा बांदेकर, उदय कांबळे, दिलीप शिगम यांसह इतर पालक या वेळी उपस्थित होते.