उत्तर प्रदेशतील फरार आरोपीला अटक
पनवेल, ता. ५ (वार्ताहर) : खुनाच्या प्रयत्नाचे दोन गंभीर गुन्हे दाखल असलेल्या आरोपीला पनवेल शहर पोलिसांनी बदलापूर येथून अटक केली आहे. उत्तर प्रदेश राज्यातून तो दोन वर्षांपासून फरार होता. गौतम निर्मलप्रसाद गौड (वय ३२) असे या आरोपीचे नाव असून उत्तर प्रदेश सरकारने त्याच्यावर ५० हजार रुपयांचे बक्षीस ठेवले होते. उत्तर प्रदेश पोलिसांचे पथक त्याला घेऊन जाण्यासाठी नवी मुंबईत दाखल झाले आहे.

आरोपी गौड याने २०२२ मध्ये गोरखपूर जिल्ह्यात खुनाच्या प्रयत्नाचे दोन गुन्हे केले होते. त्याच्या विरोधात स्थानिक झंगहा पोलिसांनी गुन्हा दाखल करून त्याचा शोध सुरू केला होता, मात्र त्यानंतर आरोपी फरार झाला होता. तेव्हापासून उत्तर प्रदेश पोलिस त्याच्या मागावर होते. पोलिसांनी त्याच्यावर ५० हजार रुपयांचे बक्षीसही जाहीर केले होते. सध्या तो बदलापूर येथे राहत असल्याची माहिती मिळाल्यानंतर गोरखपूर येथील ‘एसटीएफ’चे वरिष्ठ पोलिस निरीक्षक सत्यप्रकाश सिंग यांनी याबाबत पनवेल शहर पोलिसांना फोनद्वारे कळविले. आरोपीने पनवेल तसेच नवी मुंबई भागात काही गुन्हे केले असल्याची शक्यता असल्याने परिमंडळ-२चे पोलिस उपायुक्त विवेक पानसरे यांच्या सूचनेनुसार पनवेल शहर पोलिस ठाण्यातील सहाय्यक पोलिस निरीक्षक स्वप्निल केदार यांच्या पथकाने बदलापूर येथे सापळा रचत त्याला ताब्यात घेतले. आरोपीला पनवेल येथील प्रथमवर्ग न्यायालयात हजर केल्यानंतर न्यायालयाच्या आदेशाने त्याची तळोजा मध्यवर्ती कारागृहात रवानगी करण्यात आली आहे.

..
उत्तर प्रदेश पोलिस नवी मुंबईत दाखल
उत्तर प्रदेश पोलिसांचे एक पथक गुरुवारी नवी मुंबईत दाखल झाले असून पनवेल शहर पोलिसांच्या मदतीने आरोपी गौतम गोड याचा ट्रान्सिट रिमांड मिळवून त्याला उत्तर प्रदेश येथे नेण्याची कार्यवाही सुरू करण्यात आली आहे.