अमली पदार्थांविरोधात निदर्शने
धारावी, ता. ६ (बातमीदार) : राष्ट्रवादी काँग्रेस पार्टी शरदचंद्र पवार धारावी तालुका यांच्या वतीने ड्रग्स, चरस, गांजा अशा अमली पदार्थांविरोधात निदर्शने केली. व्यसनांमुळे तरुण पिढी बरबाद होत आहे. त्‍यामुळे राज्य सरकार विरोधात मंगळवारी (ता. २) दुपारी १२ वाजता शीव रेल्वेस्थानकासमोरील लाल बहाद्दूर मार्गावरील सागर हॉटेलसमोर तालुका अध्यक्ष उलेश गजाकोश यांच्या नेतृत्वाखाली तीव्र निदर्शने करण्यात आली. अमली पदार्थांमुळे गुन्हेगारीचे प्रमाण वाढीस लागले आहे. महाविद्यालय, शाळा व सार्वजनिक ठिकाणी उघड्यावर ड्रग्स मिळत असल्याने विद्यार्थी उद्‌ध्वस्‍त होत आहे. याकडे सत्ताधारी पक्षांचे दुर्लक्ष होत असल्याचा आरोप गजाकोश यांनी यावेळी केला. सरकारविरोधात यावेळी जोरदार घोषणाबाजी करण्यात आली. सरकारने लवकरात लवकर यावर पावले उचलावीत, अन्यथा यापेक्षा उग्र आंदोलन करण्याचा इशारा यावेळी देण्यात आला. आंदोलनस्थळी, युथ तालुका अध्यक्ष इम्रान खान, महिला तालुका अध्यक्ष हलीमा अन्सारी, वॉर्ड अध्यक्ष गोरा खान, रईस खान, राजू टोणपे, राजू होटकर उपस्थित होते.