लेखन माणसाला आत्मनिर्भर बनविते
नमिता कीर, कोकण मराठीतर्फे ‘तिचा सन्मान’ कार्यक्रम

ठाणे, ता. ६ : लेखन माणसाला आपल्या आतल्या ‘मी’ चा शोध घेऊन आत्मबळ देते आणि आत्मनिर्भर बनविते. आजच्या ज्या तीन सत्कारमूर्ती आहेत, त्यांच्यातील लिखाणाच्या सवयीमुळेच त्या समाजासमोर व्यक्त होऊ शकल्या, असे प्रतिपादन कोकण मराठी साहित्य परिषदेच्या केंद्रीय अध्यक्षा नमिता कीर यांनी केले. कोकण मराठी साहित्य परिषदेच्या ठाणे जिल्हा महिला समिती आणि शारदा एज्युकेशन ट्रस्ट यांच्यावतीने ‘तिचा सन्मान’ या कार्यक्रमात त्या बोलत होत्या.
दक्षिण आफ्रिकेतील किलोमांजारो हे जगातले पाचव्या क्रमांकाचे शिखर काबीज करणाऱ्या पहिल्या महिला हा मान मिळवणाऱ्या अमृता भालेराव, ठाण्याच्या डेप्युटी कमिशनर आणि कवयित्री व गायिका रुपाली अंबुरे मॅडम आणि अंध बँक कर्मचारी व अंध व्यक्तींसाठी भरघोस कार्य करणाऱ्या अनुजा संखे या महिलांचा यावेळी गौरव करण्यात आला. यावेळी प्रमुख पाहुण्या म्हणून डॉ. मेधा मेहेंदळे, डॉ. विधीता लिखिते, कोमसापचे जिल्हा अध्यक्ष बाळ कांदळकर, महिला समिती अध्यक्ष नितल वढावकर उपस्थित होत्या.
यावेळी जिल्हाध्यक्ष बाळ कांदळकर यांनी ज्या महिलांचा गौरव करण्यात आला, त्यावेळी त्यांचा गौरव केला.
ठाण्याच्या पोलिस उपायुक्त रुपाली अंबुरे यांनी आजोबांनी लावलेल्या वाचनाची सवय आणि त्यानंतर अमेरिकेला जाऊन घेतलेल्या वैद्यकीय शिक्षणाचा प्रवास सांगितला. त्यानंतर पोलिस दलातील सेवा आणि गुन्हेगारीच्या विश्वाचे त्यांनी अनुभव सांगितले. किलोमांजरी हे दक्षिण आफ्रिकेतील शिखर काबीज करणारी पहिली महिला अमृता भालेराव यांनी शिखर कसे काबीज केले हे रोमांचकारी पद्धतीने सांगितले; तर अंध बँक अधिकारी अनुजा संखे यांनी आपल्या अंधत्वावर मात करून बँक अधिकारी होण्याचा प्रवास मांडला. कार्यक्रमाचे सूत्रसंचालन तपस्वी नेवे यांनी, तर कोमसाप ठाणे जिल्हा महिला प्रमुख नितल वढावकर यांनी आभार मानले.