मुंबई : वीज कंपन्यांमधील कामगारांच्या वेतन कराराचा प्रलंबित प्रश्न सोडवण्यासाठी संयुक्त कृती समितीने ९ जुलैपासून संपावर जाण्याचा इशारा दिला आहे. या पार्श्वभूमीवर उपमुख्यमंत्री देवेंद्र फडणवीस यांच्यासोबत कामगार संघटनांची रविवारी (ता. ७) बैठक होणार आहे. महाराष्ट्र राज्य वीज कर्मचारी, अभियंते, अधिकारी संयुक्त कृती समितीची बैठक झाली होती. या बैठकीत मूळ वेतनात १५ टक्के, तर भत्यांमध्ये शंभर टक्के वाढ देण्याची तयारी व्यवस्थापनाने दाखवली होती. पण संयुक्त कृती समितीने या प्रस्तावावर नाराजी व्यक्त केली होती. याच पार्श्वभूमीवर सह्याद्री अतिथीगृहात उद्या, रविवारी १२ वाजता देवेंद्र फडणवीस यांच्या उपस्थितीत वेतन कराराबाबत बैठक होणार असल्याची माहिती महाराष्ट्र स्टेट इलेक्ट्रिसिटी फेडरेशनचे सरचिटणीस कृष्णा भोयर यांनी दिली.