भातसा, भारंगी नद्यांच्या पाणीपातळीत वाढ
सकाळ वृत्तसेवा
डोंबिवली, ता. ७ : उल्हास खोरे आणि ठाणे जिल्ह्यातील सह्याद्री डोंगररांगेत रात्रभर कोसळलेल्या मुसळधार पावसामुळे उल्हास, भातसा, काळू, भारंगी नद्यांच्या पाणीपातळीत रविवारी रात्रीपासून वाढ झाली आहे.

कल्याण-डोंबिवली शहरांना पाणीपुरवठा करणाऱ्या मोहिली, मोहने येथील पाणीपुरवठा केंद्रांच्या समतल पाण्याची पातळी वाढली आहे. मोहने ते टिटवाळा परिसर जोडणाऱ्या उड्डाणपुलाच्या कठड्यांना पाणी लागले आहे. पाण्याच्या पातळीमुळे टिटवाळा भागातील सावरकरनगर भागातील वस्तीत रात्रीपासून पाणी शिरले आहे. हा परिसर नद्यांच्या समतल पातळीत येतो. रात्रीपासून रहिवाशांच्या घरातील पाणी उपसण्यासाठी व्यस्त आहेत. मुसळधार पाऊस सुरू राहिल्यास कल्याणमधील दुर्गाडी परिसरातील बाजारपेठ, बैलबाजार भागात पाणी घुसण्याची शक्यता वर्तविण्यात येत आहे. त्यामुळे खाडीकिनारच्या रहिवाशांनी स्थलांतराची, तबेलेचालकांनी सावध राहून पाणीपातळी वाढली तर तबेल्यातून म्हशी बाहेर काढण्याची तयारी सुरू केली आहे. मुसळधार पावसामुळे पालिकेच्या आपत्कालीन यंत्रणा सज्ज झाल्या आहेत.

भात लागवडीच्या कामांना वेग
माहुली किल्ला परिसरात रात्रभर मुसळधार पाऊस पडल्याने सावरोली, शहापूर भागातून वाहणारी भारंगी नदी दुथडी वाहत आहेत. या नदीकिनाऱ्याच्या वस्तीत पाणी शिरले आहे. अनेकांची वाहने पाण्याखाली गेली आहेत. तर काहींच्या दुचाकी वाहून गेल्या आहेत. भातसा, काळू नद्यांच्या पात्रात वाढ झाली आहे. या मुसळधार पावसामुळे भात लागवडीच्या कामांना वेग आला आहे.

धरणाच्या पाणीपातळीत मात्र घट
रविवार सकाळपासून पावसाने उसंत घेतल्याने नद्यांच्या पाण्याच्या पातळीत घट होण्याची शक्यता वर्तवली आहे. शहापूर तालुक्यातील भातसा, तानसा, वैतरणा, अप्पर वैतरणा, मोडकसागर या धरण क्षेत्रात मुसळधार पाऊस पडला नसल्याने धरणांनी तळ गाठला आहे. या धरणांमधून मुंबईला पाणीपुरवठा केला जातो. धरणांमध्ये पाणी नसल्याने सध्या मृत साठ्यांमधून शहराला पाणीपुरवठा केला जातो.