कांदिवलीत ‘खासदार आपल्या दारी’ कार्यक्रम
नागरिकांचा उत्स्फूर्त प्रतिसाद
कांदिवली, ता. ८ (बातमीदार) ः कांदिवली पश्चिमेतील आमदार योगेश सागर यांच्या कार्यालयात झालेल्‍या ‘खासदार आपल्या दारी’ उपक्रमाला नागरिकांचा उत्‍स्‍फूर्त प्रतिसाद मिळाला. संस्था, मंडळे, स्थानिक नागरिकांनी आपल्या समस्या आणि तक्रारींचे निवेदन मंत्री, खासदार पियूष गोयल यांच्याकडे दिले.
लवकरच या समस्‍यांवर तोडगा काढण्यात येईल, असे आमदार योगेश सागर यांनी सांगितले. केंद्रीय वाणिज्य व उद्योगमंत्री खासदार पियूष गोयल हे खासदार, मंत्री झाल्यानंतर पहिल्यांदाच कांदिवली विभागात नागरिकांच्या समस्या जाणून घेण्यासाठी आले होते. सकाळी १० ते १२ या वेळेत खासगी संस्था, मंडळे आणि एसआरए योजनेमध्ये अन्याय झालेले नागरिक मोठ्या संख्येने आले होते. अर्ज पाहून नागरिकांना योग्य सल्ला देण्यात आला. काहींना पुन्हा कार्यालयात येण्यास सांगितले. सकाळी ९.३० वाजल्यापासून नागरिकांनी गर्दी केली होती. लाँग टेनिस इंडियन टीममध्ये निवड झालेल्या गिरीश मिश्राचा सत्कार पियूष गोयल यांच्या हस्ते करण्यात आला.