मुसळधार पावसामुळे रस्ते वाहतुकीचे तीनतेरा
सबवे खाली अडकलेल्या जोडप्याची सुटका
सकाळ वृत्तसेवा
मुंबई, ता. ८ : रात्रभर कोसळणाऱ्या पावसाने सोमवारीही (ता. ८) मुंबईला झोडपून काढले. सखल भागात पाणी साचल्याने शहरात अनेक ठिकाणी वाहतूक ठप्प झाली; तर ठिकठिकाणी वाहने बंद पडल्यामुळे अनेक ठिकाणी वाहतुकीवरही परिणाम झाला होता.
मुंबईतील किंग सर्कल, दादर टीटी, अंधेरी सब-वे, कांदिवली, वाकोला, कुर्ला आदी परिसरात वाहने बंद पडल्यामुळे वाहतूक मंदावली. याशिवाय हिंदमाता, अंधेरी सब-वे, वडाळा, शिवडी येथे पाणी साचले होते. पाऊस कमी झाल्यावर काही ठिकाणी पाण्याचा निचरा झाला, तर काही ठिकाणी पाण्याचा निचरा होत आहे.
रविवारी मध्यरात्री एक वाजल्‍यापासून सकाळी सात वाजेपर्यंत मुंबईत जोरदार पाऊस झाला. सक्कर चौक येथे पाणी साचल्यामुळे वडाळा व शिवडी येथे जाणारी वाहतूक मंदगतीने सुरू होती. याशिवाय अंधेरी सबवे येथेही पाणी साचल्यामुळे वाहतूक ठप्प झाली होती. याशिवाय कुर्ला एलबीएस रोडला नदीचे स्वरूप प्राप्त झाले होते. त्यामुळे तेथील वाहतूकही संथगतीने सुरू होती.
मोठ्या प्रमाणात वाहने बंद पडल्यामुळे वाहतुकीवर परिणाम झाला होता. अंधेरी आकृती मॉल येथे बेस्ट बस बंद पडल्यामुळे तेथील वाहतूक मंदावली होती. विमानतळावरील एलिव्हेटेल मार्गावर कार बंद पडून तेथील वाहतूकही प्रभावित झाली होती, वाहनांच्या बिघाडामुळे किंग सर्कल, माटुंगा उत्तरेकडे व दक्षिणेकडे जाणारी वाहतूक संथगतीने सुरू होती. कुर्ला हॅलो डेपो, दादर टीटी, वाकोला येथील राम नगर सबवे येथेही वाहने बंद पडली होती, अशी माहिती वाहतूक पोलिसांनी दिली.
--

वाहतूक पोलिस अधिकाऱ्यांचे असेही काम
ऊन असो किंवा पाऊस, वाहतूक पोलिस आपले कर्तव्य बजावत असतात. पण काही वेळा तर कर्तव्यापलीकडचे कामही केल्याचे पाहायला मिळते. मुंबईत सोमवारी झालेल्या मुसळधार पावसामुळे साचलेल्या पाण्याचा निचरा करण्यासाठी रामनगर सबवेजवळील वेस्टर्न एक्स्प्रेस हायवेवरील ड्रेनेजचे खड्डे साफ करण्यात वाकोला वाहतूक अधिकारी योगदान देत आहेत.