ठाणे, ता. ८ : गेल्या दोन दिवसांपासून जिल्ह्यात कोसळणाऱ्या पावसाने जनजीवन विस्कळित झाले आहे. रविवारी सकाळी ८.३० ते सोमवारी सकाळी ८.३० या कालावधीत जिल्ह्यात ११० मिमी पावसाची नोंद करण्यात आली असून भिंत कोसळण्याच्या काही घटनांची नोंद आहे.
जिल्ह्यातील ग्रामीण भागांसह ठाणे शहरातदेखील पावसाने दमदार हजेरी लावली आहे. रविवारी मध्यरात्रीपासून पावसाचा जोर वाढल्याचे दिसून आले. सोमवारी सकाळी हा जोर अधिक वाढल्याचे दिसून आले. यावेळी शहरात जवळपास १२७.९८ मिमी पावसाची नोंद करण्यात आली आहे. पावसामुळे शहरातील विविध भागांत पडझड झाल्याच्या घटना घडल्या. यामध्ये तीनहात नाका परिसरात असलेल्या वन विभागाची संरक्षक भिंत जमीन खचली, तर लोकमान्य पाडा क्रमांक ४ मध्ये डोंगरावरील माती खचली असून लोकमान्य नगर भागात टीएमटी बसडेपोची संरक्षक भिंत पडली. रात्रीपासून पडणाऱ्या पावसाने शहरातील टेंभी नाका, आंबेडकर रोड आदींसह वंदना परिसरातील सखल भागांत पाणी साचल्याचे दिसून आले. तसेच झाड पडण्याच्या ५, फांद्या पडल्याच्या २, धोकादायक स्थितीत वृक्ष २, प्लास्टर कोसळल्याच्या एका घटनेची आपत्ती व्यवस्थापन विभागाकडे नोंद आहे.