खर्डी, ता. ८ ः शहापूर तालुक्यात सोमवारी झालेल्या मुसळधार पावसामुळे पुराचे पाणी घरात घुसून २२३ घरांतील जीवनावश्यक वस्तू व मालमत्तेचे नुकसान झाले होते. त्याचे पंचनामे करण्यात आले असून ९१ बाधित रहिवाशांना आपत्ती व्यवस्थापन समितीने सुरक्षित स्थळी स्थलांतरित केले आहे.
शहापूर नगरपंचायत हद्दीतील गुजराती बाग येथील (७५), गुजराती नगर (३५), वासिंद सृष्टी फार्म परिसर (८१) व आवळे (३२) येथील घरात पुराचे पाणी घुसून जीवनावश्यक वस्तू व मालमत्तांचे नुकसान झाले आहे; तर गुजराती बाग येथेही मोठ्या प्रमाणात नुकसान झाले असल्याने या परिसरातील बाधित रहिवाशांना सुरक्षितस्थळी हलवण्यात आले आहे.
दरम्यान, भारंगी नदी पात्रातील अतिक्रमणामुळे हा पूर आला असल्याने नदी पात्रातील अतिक्रमण तोडण्याच्या मागणीसाठी रहिवाशांनी ‘रास्ता रोको’ केला होता. त्याची दखल घेत प्रशासनाने अतिक्रमणे हटवण्याचे काम सुरू केल्याने रहिवाशांमध्ये समाधानाचे वातावरण आहे.