उरण, ता. ९ (बातमीदार)ः उरण-मुंबई-रायगड परिसरात अवैध मासेमारी करणाऱ्या आणखी १२ मच्छीमार बोटींवर कारवाई करण्यात आली आहे. त्यामुळे महिनाभरात ३३ बोटींवर कारवाई केल्याचे उरण सहायक मत्स्यव्यवसाय परवाना अधिकारी प्रियांका भोय यांनी सांगितले.
खोल समुद्रातील मासेमारीवर बंदी असताना उरण-मुंबई-रायगड परिसरात ठिकठिकाणी अवैधरीत्या मासेमारी सुरू आहे. महिन्याभरात अशा २१ बोटींवर कारवाई करण्यात आली होती; तरीदेखील बंदी काळात बेकायदेशीर मासेमारी सुरू असल्याचे निदर्शनास आले होते. त्यामुळे अवैध मासेमारी करणाऱ्या आणखी मॉ तुळजाभवानी, खंडोबा भवानी, भोळा कनकेश्वर, रुद्रा, श्री सद्‍गुरू कृपा, विठ्ठल माऊली, दत्त माऊली कृपा, साई तिसाई, श्री समर्थ कृपा, श्री साई चिंतामणी, श्री साई मोरेश्वर, सागर लक्ष्मी एकवीरा आई अशा १२ बोटींवर कारवाई करण्यात आली आहे.