मंत्रालयात आत्महत्येचा प्रयत्न
मुंबई, ता.९ : कराड-चिपळूण मार्गावरील खड्डे सोबतच या प्रकल्पासाठी झालेली वृक्षतोड, या प्रकल्पात सरकारने संपादित केलेली जमीन आणि त्याचा न मिळालेला मोबदला या मुद्द्यांवर न्यायाच्या प्रतिक्षेत असलेल्या एकाने मंगळवारी (ता.९) मंत्रालयात आत्महत्येचा प्रयत्न केला. अरविंद पाटील (वय ५५) असे या व्यक्तीचे नाव आहे. अरविंद साताऱ्याचे रहिवासी आहेत. मंत्रालयाच्या पाचव्या मजल्यावरील सज्जावरून ते आत्महत्या करण्याच्या प्रयत्नात होते. पोलिस, अग्निशमन दलाच्या अधिकाऱ्यांनी जवळपास अर्धा तास समजूत काढल्यानंतर पाटील यांना सुखरूप खाली उतरवले. मरीन ड्राईव्ह पोलिसांनी समुपदेशन करत त्यांना आपल्या गावी पाठवून दिले. या प्रकरामुळे काही काळ मंत्रालयात गोंधळाचे वातावरण होते.