पालघर, ता. १० (बातमीदार) : मुख्यमंत्री शाश्वत कृषी सिंचन योजनेअंतर्गत ‘मागेल त्याला शेततळे’ कृषी विभागामार्फत २०२४ -२५ आर्थिक वर्षाकरिता पालघर जिल्ह्याला १३० भौतिक लक्षांक प्राप्त झालेला आहे. जिल्ह्यातील जास्तीत जास्त शेतकऱ्यांनी ‘मागेल त्याला शेततळे’ या योजनेचा लाभ ध्यावा, असे आवाहन जिल्हा अधीक्षक कृषी अधिकारी नीलेश भागेश्वर यांनी केले आहे. लाभार्थी शेतकऱ्याकडे स्वतःच्या नावावर किमान ०.२० हेक्टर क्षेत्र असावे, शेतकऱ्याची जमीन शेततळे खोदण्यास तांत्रिकदृष्ट्या योग्य असावी, अर्जदाराने यापूर्वी कुठल्याही शासकीय योजनेतून शेततळे या घटकाअंतर्गत सरकारच्या अनुदानाचा लाभ घेतलेला नसावा, या प्रमुख अटी आहेत. या योजनेंतर्गत विविध आकारमानाच्या शेततळ्यांकरिता कमाल रक्कम ७५ हजार रुपयांपर्यंत अनुदान मिळू शकते. या योजनेचा लाभ घेण्याकरिता इच्छुक शेतकऱ्यांनी ऑनलाईन पद्धतीने https://mahadbtmahait.gov.in या संकेतस्थळावर अर्ज करावेत, असेच संबंधित योजनेबाबत अधिक माहितीसाठी प्रत्येक तालुक्यातील तालुका कृषी अधिकारी कार्यालयाशी संपर्क साधावा, असेही आवाहन भागेश्वर यांनी केले आहे.